हवाई भाडा दोब्बर वृद्धि, काठमाडौँ–धनगढीको न्यूनतम भाडा ११ हजार ९० रुपैयाँ

काठमाडौँ: विश्व राजनीतिमा देखिएको पश्चिम एसियाको युद्धको प्रत्यक्ष असर नेपालको आन्तरिक हवाई क्षेत्रमा परेको छ। हवाई इन्धनको मूल्यमा ९८ प्रतिशतको भारी वृद्धि भएपछि बुधबारदेखि आन्तरिक उडानको भाडादरमा उल्लेख्य वृद्धि गरिएको हो।

वायुसेवा सञ्चालक संघका अनुसार इन्धनको मूल्य आकासिएपछि हवाई टिकटमा जोडिने फ्यूल सर चार्ज (इन्धन शुल्क) झण्डै दोब्बरले वृद्धि भएको छ। बुद्ध एयरका निर्देशक रुपेश जोशीले इन्धनको मूल्य वृद्धिका कारण सबैभन्दा धेरै आर्थिक भार काठमाडौं–धनगढी रुटको यात्रामा थपिएको जानकारी दिए।

कुन रुटमा कति पुग्यो इन्धन शुल्क?
नयाँ व्यवस्था अनुसार काठमाडौं–धनगढी रुटको फ्यूल सर चार्जमा मात्रै ५ हजार ४ सय ८० रुपैयाँ थपिएको छ।

यसअघि यो रुटमा ५ हजार ६ सय १० रुपैयाँ रहेकोमा इन्धन शुल्क अब ११ हजार ९० रुपैयाँ पुगेको छ। यो रकम हवाई टिकटको कुल मूल्य नभई केवल इन्धन बापतको अतिरिक्त शुल्क मात्र हो। यात्रुले यसबाहेक बेस फेयर (आधारभूत भाडा) र विमानस्थल सेवा शुल्क छुट्टै बुझाउनुपर्ने हुन्छ।

यससँगै काठमाडौँदेखि धनगढीसम्मको भाडा २२ हजारसम्म नाघेको छ। एयरलाइन्सहरूले नन रिफन्डेबल भाडा ११ हजार ६०० देखि १७ हजार ४८५ रुपैयाँसम्म रिफन्डेबल भाडा १८ हजार ५८४ देखि २२ हजार  २७० सम्म निर्धारण गरेका छन्।

अन्य मुख्य गन्तव्यहरूको संशोधित इन्धन शुल्क 
माउन्टेन फ्लाइट (पर्वतीय उडान): ८ हजार ६ सय १५ रुपैयाँ (४,२५५ वृद्धि)
काठमाडौं–सुर्खेत: ८ हजार ६ सय ५७ रुपैयाँ (४,२८५ वृद्धि)
काठमाडौं–नेपालगन्ज: ८ हजार १ सय ८५ रुपैयाँ (४,०४५ वृद्धि)
काठमाडौं–भद्रपुर: ७ हजार ५ सय ४० रुपैयाँ (३,७२५ वृद्धि)
काठमाडौं–विराटनगर: ६ हजार २० रुपैयाँ (२,९८० वृद्धि)
काठमाडौं–भैरहवा: ५ हजार १ सय ७० रुपैयाँ (२,५५५ वृद्धि)
काठमाडौं–पोखरा: ३ हजार ९ सय ८५ रुपैयाँ (१,९७० वृद्धि)
काठमाडौं–जनकपुर: ३ हजार २ सय ३० रुपैयाँ (१,६०० वृद्धि)
काठमाडौं–भरतपुर: २ हजार ६ सय ९० रुपैयाँ (१,३३० वृद्धि)
काठमाडौं–सिमरा: २ हजार २ सय ६० रुपैयाँ (१,१२० वृद्धि)