टिकटकर तुलसाविरुद्ध मुद्दा: साढे चार करोडको हनी ट्र्याप, २१ करोड बढीको शंकास्पद कारोबार

काठमाडौँ: जिल्ला सरकारी वकिलको कार्यालयले ललितपुरले टिकटकर तुलसा (तुल्सी)अधिकारीविरुद्ध ठगी तथा सम्पत्ति शुद्धिकरणको मुद्दा दायर गरेको छ। कुमार चिमोरियाले हनी ट्र्यापमा पारी आफूसँग ४ करोड ५० लाख रुपैयाँ हनी ट्रयापमा पारी आपराधिक लाभ लिएको उजुरीको आधारमा उनीविरुद्ध मुद्दा दायर भएको हो।

हनी ट्र्यापमा पारी डर धम्की देखाइ चरणवद्ध रूपमा रकम असुल गरेको आरोप उनको छ। टिकटकर तुल्सीको दैनिकी एकदम खर्चिलो रहेको, अश्वभाविक विदेश यात्राहरू समेत रहेको, विदेशमा लगानी, नेपालमा समेत बिभिन्न व्यवसायहरु संचालन रहेको, तुल्सी र निजको छोरीको खर्च समेत अस्वभाविक रहेको भन्दै आयस्रोतका बारेमा पनि अनुसन्धान गर्न मागसहित चिमोरियाले जाहेरी दरखास्त दिएका थिए।

सो आधारमा गरिएको अनुसन्धानपश्चात् जिल्ला सरकारी वकिलले आपराधिक लाभ ठगीसहित सम्पत्ति शुद्धिकरणमा पनि मुद्दा दायर गरेको हो। सामान्य आर्थिक अवस्था भएकी र सवारी शोरुममा कर्मचारीका रूपमा कार्यरत तुल्सीको पछिल्लो चार वर्षमा अस्वाभाविक रूपमा २१ करोडभन्दा बढीको वित्तीय कारोबार गरेको देखिएको अभियोगपत्रमा उल्लेख छ।

उक्त रकम उनले आफ्ना कर्मचारी, परिवारका सदस्य र सहयोगीका नाममा रहेका १९ वटा बैंक खातामा ‘लेयरिङ’ (तहकिकरण) गर्दै ललितपुरको भैँसेपाटीमा ४ करोडको घर र नवलपरासीमा जग्गा खरिद गरेको पाइएको सरकारी वकिलको दाबी छ। ५३ पटक वैदेशिक भ्रमण गरेकी अधिकारीले अवैध धनलाई तुल्सा कलेक्सन र टिपुरी कलेक्सन जस्ता कम्पनीमार्फत वैध बनाउने प्रयास गरेको भन्दै सरकारी वकिल कार्यालयले निजविरुद्ध विगोको दोब्बर जरिवाना र १० वर्षसम्म कैदको मागदाबी गरेको छ।

जिल्ला सरकारी वकिल कार्यालय ललितपुरले ९ जना व्यक्ति र एउटा कम्पनी गरी १० प्रतिवादीविरुद्ध आपराधिक लाभ, संगठित अपराध र सम्पत्ति शुद्धीकरणको कसुरमा मुद्दा दायर गरेको हो।

मुख्य अभियुक्त तुलसा अधिकारीसहित उनका सहयोगीहरू निलिका लामिछाने, मुकेश कुमार धानुका, दिल कुमारी लिम्बु, प्रयास पोखरेल, सपना वली, गंगा अधिकारी सुवेदी, मेघनाथ बस्याल र अशोक कुमार अग्रवाल, कर्मचारीहरू सपना वली, इन्द्र प्रकाश वली, मनिषा केसीलाई पनि प्रतिवादी बनाइएको छ।

अदालतमा दायर अभियोग पत्रमा प्रतिवादीहरूको नाममा रहेको घर, जग्गा, बैंक मौज्दात र कम्पनीको शेयर समेत जफत गर्न माग गरिएको छ। हाल मुख्य अभियुक्त तुलसा अधिकारीसहित ८ जना फरार छन् भने पक्राउ परेकी निलिका लामिछानेलाई हाजिर जमानीमा छाडिएको छ।