अर्थमन्त्री र अमेरिकाका सहायक विदेश मन्त्रीबीच भेटवार्ता, के विषयमा भयो छलफल ?

काठमाडौँः अर्थमन्त्री स्वर्णिम वाग्ले र संयुक्त राज्य अमेरिकाका सहायक विदेशमन्त्री एप पल कपुर बीच मंगलबार सिंहदरबारस्थित अर्थ मन्त्रालयमा शिष्टाचार भेटवार्ता भएको छ। भेटमा दुई देशबीचको द्विपक्षीय सम्बन्ध, लगानी प्रवर्द्धन र भावी सहकार्यका सम्भावनाबारे विस्तृत छलफल भएको हो।

छलफलका क्रममा मन्त्री वाग्लेले हालै सम्पन्न निर्वाचनपछि बनेको सरकारले सुशासन, आर्थिक सुधार र दिगो पूर्वाधार विकासलाई उच्च प्राथमिकतामा राखेको बताए। लगानीमैत्री वातावरण निर्माण गर्न पुराना कानुन परिमार्जन तथा नयाँ नीतिगत व्यवस्था ल्याउने तयारी भइरहेको उनको भनाइ थियो।

उनले विशेषगरी पर्यटन, स्वच्छ ऊर्जा र सूचना प्रविधि क्षेत्रमा विदेशी लगानी आकर्षित गर्न सरकार सक्रिय रहेको उल्लेख गरे। साथै, गैरआवासीय नेपाली तथा अमेरिकी लगानीकर्तालाई नेपालमा अवसर खोज्न आग्रह समेत गरे।

यस अवसरमा कपुरले नेपाल–अमेरिका सम्बन्ध ऐतिहासिक रूपमा बलियो रहेको उल्लेख गर्दै नयाँ सरकारका सुधारमुखी प्रयासप्रति सकारात्मक दृष्टि रहेको बताए। उनले अमेरिकाले नेपालको आर्थिक विकास र स्थायित्वका प्रयासलाई नजिकबाट नियालिरहेको पनि स्पष्ट पारे।

भेटवार्तालाई आगामी दिनमा आर्थिक सहकार्य विस्तार गर्ने दिशामा महत्वपूर्ण संकेतका रूपमा हेरिएको छ।