एफएनसीसीआईको निर्वाचन तयारी पुरा, ७३ पदमा १३७ जनाको उम्मेदवारी

काठमाडौं। उद्योगी व्यवसायीहरुको छाता संगठन नेपाल उद्योग वाणिज्य महासंघ (एफएनसीसीआई) को ६० औँ वार्षिक साधारणसभा तथा नयाँ नेतृत्वका लागि निर्वाचनको सम्पुर्ण तयारी पुरा भएको छ।

यही वैशाख २१ र २२ गते (सोमबार र मंगलबार) राजधानीमा आयोजना हुन लागेको साधारणसभाको सम्पुर्ण तयारी पुरा भएको जनाइएको छ।

साधारणसभाबाट महासंघको नयाँ कार्यसमिती चयन हुनेछ जसका लागि ७३ पदका लागि १३७ जना उम्मेदवार मैदानमा उत्रिएका छन्। महासंघको विधानअनुसार हालका वरिष्ठ उपाध्यक्ष अञ्जन श्रेष्ठ स्वतः अध्यक्ष बन्नेछन्।

बाँकी चार उपाध्यक्षसहित अन्य पदका लागि निर्वाचन हुनेछ। साधारणसभा २१ वैशाखमा ललितपुरस्थित होटेल रोयल टुलिपमा उद्घाटन हुने तथा २२ वैशाखमा नेपाल प्रज्ञा–प्रतिष्ठानमा मतदान हुने कार्यक्रम रहेको महासंघले जानकारी दिएको छ।

निर्वाचनमा वरिष्ठ उपाध्यक्षका दाबेदार हेमराज ढकाल प्यानलसहित प्रतिस्पर्धामा छन्। ढकाल समूहलाई वर्तमान अध्यक्ष चन्द्रप्रसाद ढकाल र अञ्जन श्रेष्ठको साथ रहेको छ। यो समूहको वरिष्ठ उपाध्यक्षमा रामचन्द्र संघई वा सुरकृष्ण वैद्य को हुने हो टुंगो लाग्न बाँकी छ।

ढकाल हाल महासंघको वस्तुगततर्फका उपाध्यक्ष छन्। ढकाल प्यानलबाट एसोसियट उपाध्यक्षमा ज्योत्सना श्रेष्ठ, वस्तुगतमा नरेशलाल श्रेष्ठ, जिल्ला नगर उपाध्यक्षहरूमा कल्पना गैरे र उमेश डाल्मियाले उम्मेदवारी घोषणा गरेका छन्।

ज्योत्सना हाल महासंघको एसोसियट्तर्फको उपाध्यक्ष र गैह्रै कार्यकारणी सदस्य छिन्। अञ्जन समूहले एसोसियट उपाध्यक्षमा प्रवलजंग पाण्डे, वस्तुगत उपाध्यक्षमा शिवप्रसाद घिमिरे, जिल्ला नगरको तर्फबाट उपाध्यक्ष दिलसुन्दर श्रेष्ठ र कृष्णप्रसाद शर्माले उम्मेदवारी दिएका छन्।

महासंघका अनुसार कुल २१ सय ५३ मतदाता निर्वाचनमा सहभागी हुनेछन् जसमा सबैभन्दा धेरै एसोसिएटतर्फका मतदाता रहेका छन्।

महासंघको अध्यक्ष अबदेखि प्रत्यक्ष निर्वाचनबाट चयन हुने भएको छ। यसअघिको विधानमा महासंघका वरिष्ठ उपाध्यक्ष स्वतः अध्यक्ष हुने प्रावधान छ। यो प्रावधान हालका वरिष्ठ उपाध्यक्ष अन्जन श्रेष्ठ स्वतः अध्यक्ष भएपछिको अर्को एक कार्यकालपछि लागू हुने भएको छ।

भवानी राणाको पालादेखि विधान संशोधन गरी वरिष्ठ उपाध्यक्ष स्वतः अध्यक्ष हुने व्यवस्था भएको थियो। बहालवाला अध्यक्ष ढकालले निर्वाचनकै समयमा विधान संशोधन गर्दै अध्यक्ष प्रत्यक्ष निर्वाचित गर्ने वाचा गरेका थिए।

संशोधित नयाँ विधानमा वरिष्ठ उपाध्यक्ष दुई जनाको व्यवस्था गरिएको छ। हाल एक महिला उपाध्यक्ष रहेकामा थप एक जना महिला उपाध्यक्षको पनि व्यवस्था गरिएको छ।