नेप्सेमा सूचिकृत सागर डिष्टिलरीको घाटा तीन करोड ५३ लाख

काठमाडौं। नेपाल स्टक एक्सचेन्ज (नेप्से) मा सूचिकृत सागर डिष्टिलरी लिमिटेड घाटामा गएको छ। चालू आर्थिक वर्षको तेस्रो त्रैमाससम्म तीन करोड ५३ लाख ५७ हजार रुपैयाँ घाटा भएको कम्पनीले बुधबार सार्वजनिक गरेको वित्तीय विवरणमा उल्लेख छ।

कम्पनीको घाटा गत आर्थिक वर्षको सोही अवधिको तुलनामा बढेको हो। गत आर्थिक वर्षको तेस्रो त्रैमाससम्म कम्पनीले दुई करोड ६१ लाख रुपैयाँ घाटा व्यहोरेको थियो।

कम्पनीको आम्दानी भने उल्लेख्य रूपमा बढेको छ। चालु आवको तेस्रो त्रैमाससम्म कम्पनीले ८ करोड ४७ लाख रुपैयाँ आम्दानी गरेको छ। जुन गत आवको सोही अवधिको ६ करोड १ लाख रुपैयाँको तुलनामा ४०.८८ प्रतिशत बढी हो। गभर्नर ह्विस्कीको बिक्री बढेपछि आम्दानी बढेको कम्पनीले जनाएको छ।

आम्दानी बढे पनि बिक्री तथा वितरण खर्च उच्च दरले बढ्दा कम्पनीको घाटा थप चुलिएको हो। समीक्षा अवधिसम्म कम्पनीको बिक्री तथा वितरण खर्च ७८.२१ प्रतिशतले वृद्धि भएर ३ करोड ५८ लाख रुपैयाँ पुगेको छ।

वित्तीय सूचकअनुसार कम्पनीको प्रतिसेयर आम्दानी ६ रुपैयाँ ४९ पैसा ऋणात्मक रहेको छ। त्यस्तै, प्रतिसेयर नेटवर्थ १२७ रुपैयाँ ०८ पैसा तथा करेन्ट रेसियो १.७१ गुणा रहेको कम्पनीले जनाएको छ। चुक्ता पुँजी ७२ करोड ६० लाख रुपैयाँ रहेको छ। कम्पनीको ऋण १५ करोड ७३ लाख रुपैयाँ छ।