सन्दीपले बनाए सर्वाधिक छिटो १५० रन बनाउने कीर्तिमानी रेकर्ड

काठमाडौँ: नेपालका स्टार लेगस्पिनर सन्दीप लामिछानेले ले एकदिवसीय अन्तर्राष्ट्रिय क्रिकेटमा नयाँ इतिहास रचेका छन्। घरेलु मैदानमा जारी आईसीसी क्रिकेट वर्ल्ड कप लिग २  अन्तर्गत स्कटल्यान्ड विरुद्धको खेलमा उनले विश्वकै सबैभन्दा कम खेलमा १ सय ५० विकेट पूरा गर्ने कीर्तिमान बनाएका छन्।

यससँगै सन्दीपले यसअघि  मिचेल स्टार्कको नाममा रहेको विश्व रेकर्ड आफ्नो पक्षमा पारेका छन्। अस्ट्रेलियाका स्टार बलर स्टार्कले सन् २०१९ मा वेस्ट इन्डिजविरुद्ध खेल्दै ७७ खेलमा १५० विकेट पूरा गरेका थिए। तर सन्दीपले त्यो उपलब्धि केवल ७३ ओडीआई खेल र ७१ इनिङ्समै हासिल गर्दै नयाँ कीर्तिमान कायम गरे।

स्कटल्यान्डविरुद्धको खेलमा उनले आफ्नो दोस्रो विकेट लिएसँगै १५० विकेटको ऐतिहासिक आँकडा छोएका थिए। खेलको १२औँ ओभरमा जर्ज मुन्सेलाई आउट गरेका सन्दीपले त्यसपछि २०औँ ओभरको अन्तिम बलमा ७३ रन बनाएका ब्रान्डन मकमलेनलाई पेभिलियन फर्काउँदै विश्व कीर्तिमान आफ्नो नाममा दर्ता गराए। उक्त क्याच इशान पाण्डेले ले समातेका थिए।

सन्दीपको एकदिवसीय करिअरमा उत्कृष्ट बलिङ प्रदर्शन भने सन् २०२१ मा भएको थियो। उनले लिग–२ अन्तर्गत पपुआ न्युगेनियाविरुद्ध ११ रन खर्चेर ६ विकेट लिएका थिए, जुन अहिलेसम्म उनको उत्कृष्ट ओडीआई बलिङ फिगर हो।

रोचक पक्ष के छ भने, एकदिवसीय क्रिकेटमा सबैभन्दा छिटो १ सय विकेट लिने विश्व कीर्तिमान पनि सन्दीपकै नाममा सुरक्षित छ। उनले केवल ४२ खेलमै त्यो आँकडा पूरा गरेका थिए। यति मात्र होइन, लगातार तीन ओडीआई खेलमा चार–चार विकेट लिने दुर्लभ उपलब्धि पनि उनकै नाममा रहेको छ।