मोबाइलमा विश्वकप फुटबलका १०४ खेल डी–गो एपमार्फत् मात्र रु. ५४९ मा हेर्न सकिने

काठमाडौँ: डिशहोम डिजिटल प्रालिको डिजिटल स्ट्रिमिङ प्लेटफर्म डी–गोले फिफा विश्वकप २०२६ का सबै खेल मोबाइलमार्फत सुलभ मूल्यमा हेर्न मिल्ने नयाँ सेवा सार्वजनिक गरेको छ। कम्पनीका अनुसार अब दर्शकहरूले केवल रु. ५४९ मा ‘मोबाइल–ओन्ली पास’ खरिद गरी विश्वकपका सबै १०४ खेलको प्रत्यक्ष प्रसारण हेर्न सक्नेछन्।

डी–गोले सार्वजनिक गरेको यस प्याकेजमार्फत प्रयोगकर्ताले मोबाइलमै १०८० पिक्सल फुल एचडी गुणस्तरमा खेल हेर्न सक्नेछन्। साथै नेपाली तथा अंग्रेजी दुवै कमेन्टरी विकल्प पनि उपलब्ध हुने बताइएको छ।

कम्पनीका अनुसार नेपाली दर्शकलाई सुरक्षित, सहज र किफायती डिजिटल खेल अनुभव प्रदान गर्नु यस योजनाको मुख्य उद्देश्य हो। ‘हामी चाहन्छौँ दर्शकले कुनै पनि झन्झट बिना आफ्नै मोबाइलबाट विश्वकपको रोमाञ्चक अनुभव लिन सकून्,’ कम्पनीले जारी गरेको सूचनामा भनिएको छ।

डी–गोले मोबाइल पास खरिद प्रक्रिया पनि सरल बनाएको छ। प्रयोगकर्ताले एप खोलेर केही क्लिकमै पास सक्रिय गर्न सक्नेछन्। त्यसैगरी कम्पनीले अनधिकृत तथा निःशुल्क स्ट्रिमिङ साइट वा एपहरूबाट सावधान रहन आग्रह गरेको छ। यस्ता प्लेटफर्महरूले व्यक्तिगत तथा बैंकिङ विवरण जोखिममा पार्न सक्ने भन्दै आधिकारिक माध्यम प्रयोग गर्न सुझाव दिइएको छ।