७७ जिल्लामा दलित होमस्टे सञ्चालन गर्नेगरी बजेट राखेका छौँ: मन्त्री पौडेल

काठमाडौँ: संस्कृति, पर्यटन तथा नागरिक उड्डयनमन्त्री खड्गराज पौडेलले पर्यटनलाई ‘खुसीको खोज र खुसी बेच्ने व्यवसाय’का रूपमा व्याख्या गर्दै यसबाट देशको आम्दानी बढाउन सकिने बताएका छन्। बुधबार प्रतिनिधिसभामा सांसदहरूले उठाएका प्रश्नहरूको जवाफ दिँदै उनले पर्यटनलाई सामाजिक र आर्थिक रूपान्तरणसँग जोडेर अघि बढाइने बताए।

मन्त्री पौडेलले भने, ‘पर्यटन भनेको खुसीको खोजमा जाने काम हो। त्यो खुसी बेचेर हामीले पर्यटनबाट आम्दानी गर्ने हो। त्यसैले बजेट समेटे पनि नसमेटिए पनि सबै सांसदहरूमा खुसीको हासो हास्न अनुरोध गर्छु।’

उनका अनुसार पशुपति र लुम्बिनी क्षेत्रका आफ्नै आन्तरिक कोष रहने भएकाले ती आयोजनाहरूलाई सम्बन्धित व्यवस्थापन प्रणाली मार्फत सञ्चालन गरिने व्यवस्था रहेको भन्दै बजेटमा छुट्टै रूपमा नसमेटिएको बताए। ‘पशुपति लुिम्बनीको आफ्नै आन्तरिक कोषहरू हुन्छ। उहाँहरूले आफ्नै तरिकाले एलएमबिआइएस् मार्फत आफै विनियोजन गर्छौ। त्यसैले यहाँ समेटिएको छैन,’ उनले भने।

मन्त्री पौडेलले ७७ वटै जिल्लामा कम्तीमा एक–एक वटा दलित होमस्टे सञ्चालन गर्ने योजना रहेको पनि जानकारी दिए।

‘हामीले ७७ वटा जिल्लामा कम्तिका १/ १ वटा दलित होमस्टे सञ्चालन गर्नेगरी बजेट राखेका छौँ। अपुग बजेटलाई थप हुने गरि अर्को शीर्षकमा पनि बजेट राखेका छौं,’ उनले भने, ‘यसले दलित समुदायको सामाजिक रूपान्तरणमा सहयोग गर्नेछ। उनीहरूको किचन, बाथरुम लगायत पूर्वाधारको प्रवद्र्धन र गुणस्तर सुधार हुनेछ।’

त्यसैगरी मन्त्रालयले १० वर्षसम्म सरकारी कार्यक्रमहरू दलित होमस्टेमा बस्ने गरी सञ्चालन गर्न अन्य निकायलाई पनि प्रोत्साहित गर्ने नीति लिएको उनले बताए।

कर्णाली र सुदूरपश्चिमका तोकिएका स्थानहरूमा घुम्न जाने १२ कक्षा उत्तीर्ण सामुदायिक विद्यालयका विद्यार्थीका लागि शैक्षिक भ्रमण अनुदानको व्यवस्था गरिएको पनि मन्त्री पौडेलले जानकारी दिए।

उनले भने, ‘कर्णाली र सुदूरपश्चिमका तोकिएका स्थानहरू घुम्न जाने १२ कक्षा पढेका बालबालिकाहरूको लागि सामुदायिक विद्यालयका बालबालिकाहरूको लागि शैक्षिक भ्रमणमा अनुदानको व्यवस्था गरेका छौं। त्यसले सामाजिक अन्तरघुलन गर्ने काम गर्छ।’

उनका अनुसार यी कार्यक्रमहरूले पर्यटनमार्फत सामाजिक समावेशिता र तल्लो वर्गको लाभ सुनिश्चित गर्ने लक्ष्य राखेका छन्।