४ प्रतिशत बालबालिकामा दृष्टिदोष

काठमाडौं– नेपाल नेत्रज्योति संघ र अर्विसको सहकार्यमा सञ्चालित नेपाल रिच परियोजनाबाट करिब ८ लाख बालबालिका लाभान्वित भएका छन्। परीक्षण गरिएमध्ये ४ प्रतिशत बालबालिकामा दृष्टिदोषको समस्या देखिएको छ। अर्विसको आर्थिक सहयोगमा नेपाल नेत्रज्योति संघले सञ्चालन गरेको उक्त परियोजनामार्फत झापा मोरङ, पर्सा, सुनसरी र सिराहाका ७ लाख ८५ हजार ४६० जना बालबालिकाको निःशुल्क आँखा परीक्षण गरिएको हो।

सन् २०१८ देखि २०२२ सम्म चलेको परियोजनामार्फत ६ देखि १८ वर्षसम्मका विद्यालय जाने र नजाने बालबालिकाको आँखा परीक्षण गरिएको थियो। आँखा परिक्षणपछि समस्या देखिएका बालबालिकालाई निःशुल्क चस्मा तथा शल्यक्रियासमेत गरिएको संघका कार्यक्रम व्यवस्थापक रञ्जन शाहले बताए। परियोजनामार्फत ४ वर्षमा २ हजार ५५५ वटा निजी तथा सामुदायिक विद्यालयमा आँखा जाँच गरिएको थियो।

उक्त जाँचका क्रममा दृष्टिमा समस्या देखिएका २० हजार ३८० जना बालबालिकालाई निःशुल्क चस्मा वितरण गर्नुका साथै २०१ जना बालबालिकाको आँखाको निःशुल्क शल्यक्रियासमेत गरिएको उनले जानकारी दिए। शाहका अनुसार आँखा जाँच गरी वितरण गरिएका चस्मामध्ये ६३ प्रतिशत बालबालिकाले मात्र नियमित रुपमा प्रयोग गरिरहेका छन्। ‘चस्मा लगाउँदा साथीहरुले जिस्क्याउने, आमाबाबुले छोरीहरुलाई विवाह गर्न कठिनाइ हुने भन्दै चस्मा लगाउन नदिने, चस्मा लगाउँदा सहज नहुने र लजाउनेजस्ता कारणले पनि बालबालिकाले नियमित रुपमा चस्मा नलगाएको देखिन्छ,’ शाहले भने।

यसरी वितरण गरिएका चस्माको नियमित प्रयोगबाट प्रभावित विद्यार्थीको शैक्षिक स्तरमा उन्नति र दैनिकीमा समेत धेरै परिवर्तन आएको उनले दाबी गरे। नेपाल नेत्रज्योति संघ आरएम केडिया आँखा अस्पताल, नेपाल नेत्रज्योति संघ सगरमाथा चौधरी आँखा अस्पताल, नेपाल नेत्रज्योति संघ विराटनगर आँखा अस्पताल र मेची आँखा अस्पतालमार्फत यी जिल्लामा कार्यक्रम सञ्चालन गरिएको थियो।

नेपाल नेत्रज्योति संघले कोही पनि नागरिक पहुँच र पैसा अभावमा आँखा उपचार सेवाबाट वञ्चित नहुन् भन्ने उद्देश्यले विभिन्न दातृ निकायसँगको सहकार्यमा देशैभर विभिन्न निःशुल्क शिविर आयोजना गरिरहेको संघका कार्यकारी निर्देशक डा.शैलेशकुमार मिश्रले बताए। परियोजनाले कार्यक्रम सञ्चालित जिल्लाका महिला स्वास्थ्य स्वयंसेविका, शिक्षक तथा विद्यालयका भिजन एम्ब्यास्डरलाई आँखा जाँचसम्बन्धी आधारभूत तालिमसमेत दिएको थियो।