रोनाल्डोको विश्वकप सपना समाप्त!

क्रिस्टियानो रोनाल्डोको विश्वकप सपनालाई उनका कट्टर अन्तर्राष्ट्रिय प्रतिद्वन्द्वी स्पेनले अन्त्य गरिदिएको छ। मिकेल मेरिनोको अन्तिम समयको निर्णायक गोलको मद्दतले स्पेन २०२६ विश्वकपको क्वार्टरफाइनलमा प्रवेश गरेको छ।

थोरै अवसरहरू सिर्जना भएको एक औसत खेलमा, आर्सनलका खेलाडी मेरिनोले इन्जुरी समयमा पोर्चुगलका सेन्टर-हाफहरू बीचबाट उस्तै गतिमा दौडिँदै तल्लो कुना च्यापेर गोल गरी खाता खोलेका थिए।

४१ वर्षीय रोनाल्डोले यो खेलअघि नै आफ्नो यो अन्तिम विश्वकप हुने बताएका थिए। अब खेल जगतका महान् खेलाडीमध्येका एक उनले अन्तर्राष्ट्रिय फुटबलबाट सन्यास लिनेछन् कि छैनन् भन्नेमा सबैको नजर हुनेछ। पोर्चुगलका मुख्य प्रशिक्षक रोबर्टो मार्टिनेजले खेलपछि साढे तीन वर्षको कार्यकाल समाप्त गर्दै आफ्नो पद छाड्ने घोषणा गरेका छन्।

वर्तमान युरोपेली च्याम्पियन स्पेनले अब सेमिफाइनल प्रवेशका लागि बेल्जियमसँग प्रतिस्पर्धा गर्नेछ। स्पेनको जितसँगै २०२६ विश्वकपका आठ क्वार्टरफाइनलिस्टमध्ये पाँच टोलीको टुंगो लागेको छ।

पोर्चुगलको विश्वकप रेकर्ड सन् २००६ मा सेमिफाइनल पुगेयता उत्साहजनक छैन। २०१० मा अन्तिम १६, २०१४ मा समूह चरण,  २०१८ मा अन्तिम १६ र २०२२ मा क्वार्टरफाइनलबाट पोर्चुगल बाहिरिएको थियो।

पोर्चुगलले २०१६ को युरोपेली च्याम्पियनसिप जिते पनि विश्वकपमा भने उसको प्रदर्शन फितलो रहँदै आएको छ। पोर्चुगलका समर्थकहरूलाई राम्ररी थाहा छ कि हालैका प्रतियोगिताहरूको प्रदर्शन पर्याप्त छैन। रोबर्टो मार्टिनेजले यसमा केही योगदान त गरे, तर राष्ट्रिय टोलीमा यस्ता समस्याहरू गुम्सिएका छन् जसको समाधान कुनै पनि प्रशिक्षकले विश्वमञ्चमा पाउन सकेका छैनन्।

भिसेन्टे डेल बोस्कको नेतृत्वमा स्पेनले २००८ देखि २०१२ को बीचमा तीनवटा ठूला ट्रफीहरू (दुई युरो र एक विश्वकप) जितेको थियो। लुइस डे ला फुएन्टेको टोलीले पनि दुई वर्षअघि जर्मनीमा एक उपाधि जितिसकेको छ। अहिलेको स्पेनिस टोलीले जसरी कुशलतापूर्वक र शान्त ढंगले आफ्नो काम गरिरहेको छ, त्यो निकै व्यावसायिक छ।

स्पेनका लागि दोस्रो विश्वकप उपाधिले यी खेलाडीहरूको नाम राष्ट्रको खेल इतिहासमा स्वर्ण अक्षरले लेखिनेछ। पोर्चुगल जस्तो खतरनाक टोलीलाई थोरै अवसरमा सीमित राख्नुले स्पेन यो पटक अन्त्यसम्म जान सक्छ भन्ने थप प्रमाण दिएको छ।

स्पेनले २०१० को विश्वकप जितेको थियो। त्यसपछि लगातार दुई विश्वकप खेलमा उही सुरुआती ११ खेलाडीहरू मैदानमा उतारेको पोर्चुगले यो जितमा भने वैकल्पिक खेलाडीहरूले मौकाको फाइदा उठाउँदै टोलीलाई अन्तिम आठमा पुर्‍याए। फेरान टोरेसको पासमा मिकेल मेरिनोले गरेको गोल फिफा विश्वकपको इतिहासमा दुई स्पेनिस वैकल्पिक खेलाडीहरू मिलेर गोल गरेको मात्र तेस्रो अवसर हो। यसअघि १९८२ मा युगोस्लाभियाविरुद्ध र २०१४ मा अष्ट्रेलियाविरुद्ध यस्तो भएको थियो।

पोर्चुगल पनि यो विश्वकपबाट बाहिरिने जर्मनी, नेदरल्याण्ड्स र ब्राजिल जस्ता फलेन जायन्ट्स (बाहिरिएका ठूला टोली) को सूचीमा थपिएको छ। यी चारै राष्ट्र क्वार्टरफाइनलमा पुग्ने छैनन् भनेर सायद धेरैले अनुमान गरेका थिएनन्। त्यसको सट्टा मोरक्को, नर्वे, र स्विट्जरल्याण्ड वा कोलम्बिया जस्ता टोलीहरू प्रतियोगितामा बाँकी छन्। फ्रान्स, इङ्गल्याण्ड, अर्जेन्टिना र स्पेन अहिले बलिया टोलीका रूपमा देखिएका छन्, जो कम्तीमा सेमिफाइनलअघि एक-अर्कासँग भिड्ने छैनन्।

स्पेनका मिकेल मेरिनो २०२६ विश्वकपमा गोल गर्ने पाँचौँ फरक आर्सनलका खेलाडी हुन्। प्रिमियर लिग च्याम्पियन आर्सनलका धेरै खेलाडीहरूले एउटै विश्वकपमा गोल गरेको यो नयाँ कीर्तिमान हो। मेरिनो बाहेक भिक्टर ग्योकेरेस (स्विडेन), लियान्द्रो ट्रोसार्ड (बेल्जियम), ग्याब्रियल मार्टिनेली (ब्राजिल) र काइ हाभर्ट्ज (जर्मनी) ले पनि यसअघि गोल गरिसकेका छन्।