मिटरब्याजी पीडित र गृहमन्त्रीबीच निर्णायक वार्ता हुँदै, ६ बुँदे मागमा सहमति जुटाउने प्रयास

रौतहट: मिटरब्याज र ठगीविरुद्ध लामो समयदेखि आन्दोलनरत किसान–मजदुर तथा पीडितहरू र गृहमन्त्री सुधन गुरुङबीच आज (बिहीबार) तेस्रो चरणको वार्ता हुँदैछ। बाराको निजगढस्थित नगर उद्योग वाणिज्य संघको सभाहलमा मध्याह्न १२ बजे बस्ने यो बैठकलाई दुवै पक्षले ’निर्णायक’ रूपमा लिएका छन्।

यसअघि मंगलबार र बुधबार दैनिक करिब पाँच–पाँच घण्टा चलेका पहिलो र दोस्रो चरणका वार्ताहरू बिना निष्कर्ष टुङ्गिएपछि आजको छलफलमा सबैको ध्यान केन्द्रित भएको छ।

मिटरब्याज तथा ठगीविरुद्ध किसान–मजदुर आन्दोलन, नेपालको नेतृत्वमा पीडितहरूले गत असार २५ गते धनुषाको जनकपुरस्थित ऐतिहासिक तिरहुतिया गाछीबाट काठमाडौंतर्फ ‘पैदल मार्च’ (न्याय यात्रा) सुरु गरेका थिए।

चर्को घाम र वर्षाको पर्वाह नगरी न्यायको खोजीमा हिँडेका पीडितहरूको गुनासो सुन्न र आन्दोलनलाई सम्बोधन गर्न गृहमन्त्री गुरुङ आफैं बाराको निजगढ आइपुगेका हुन्।

आन्दोलनकारीहरूले गृह प्रशासनसमक्ष आफ्ना समस्या समाधानका लागि स्पष्ट खाकासहित छ बुँदे माग अघि सारेका छन्। उनीहरू फर्जी लिखत खारेज, मिटरब्याजविरुद्ध शक्तिशाली विशेष ऐन निर्माण, विशेष न्यायाधिकरण गठन, साहु–महाजनको सम्पत्तिको छानबिन, पीडितको सम्पत्ति फिर्ता तथा न्यायपूर्ण आर्थिक कारोबार सुनिश्चित गर्नुपर्ने लगायतका छ बुँदे माग गृहमन्त्रीसमक्ष राखेका छन्।

विगत दुई दिनका वार्ताहरूमा मागका प्राविधिक र कानुनी जटिलतामाथि विस्तृत छलफल भएको बुझिएको छ।

आन्दोलनकारीका प्रतिनिधिहरूले राज्यले ठोस र कार्यान्वयनयोग्य प्रतिबद्धता नजनाएसम्म आन्दोलन नरोक्ने अडान लिएका छन् भने सरकारी पक्षले कानुनसम्मत ढङ्गले समस्या समाधान गर्न गृहकार्य भइरहेको बताएको छ।

आज मध्याह्न १२ बजे सुरु हुने तेस्रो चरणको वार्ताले मिटरब्याज पीडितहरूको यो लामो र कष्टकर सङ्घर्षलाई कसरी तार्किक निष्कर्षमा पुर्याउँछ भन्ने कुरा निर्धारण गर्नेछ। देशभरका हजारौं मिटरब्याज पीडितहरू अहिले निजगढको यो वार्तालाई निकै चासोका साथ हेरिरहेका छन्।