निजी क्षेत्रको लगानी बढे मात्रै आर्थिक समृद्धि सम्भवः अर्थमन्त्री वाग्ले

काठमाडौँः अर्थमन्त्री डा. स्वर्णिम वाग्लेले निजी क्षेत्रले उच्च मनोबलका साथ लगानी विस्तार गरे मात्रै मुलुकको आर्थिक समृद्धि सम्भव हुने बताएका छन्। उनले सरकारले निजी क्षेत्रका समस्या समाधान गर्दै लगानी र व्यवसायमैत्री वातावरण निर्माणलाई उच्च प्राथमिकतामा राखेको पनि स्पष्ट पारे।

मंगलबार उत्पादनमूलक उद्योग सञ्चालन गरिरहेका ३० भन्दा बढी उद्योगीसँगको छलफलमा अर्थमन्त्री वाग्लेले उद्योगीका गुनासा र सुझाव सम्बोधन गर्न अर्थ मन्त्रालयमा ‘रेस्पोन्स डेस्क’ स्थापना गरिने जानकारी दिए।

‘तपाईंहरूका माग र सुझावलाई हामीले गम्भीरतापूर्वक लिएका छौं। ती विषय सम्बोधन गर्न मन्त्रालय तयार छ। एउटा डेस्क नै स्थापना गरेर उद्योगीसँग सम्बन्धित विषयमा समन्वय र सहजीकरण गर्नेछौं,’ उनले भने।

अर्थमन्त्री वाग्लेका अनुसार उक्त डेस्कले उद्योगीका समस्या समाधानका लागि सम्बन्धित मन्त्रालय तथा निकायसँग समन्वय गर्दै आवश्यक पहल गर्नेछ।

उनले नेपाललाई अधिकतम लगानीमैत्री र व्यवसायमैत्री मुलुकका रूपमा स्थापित गर्ने सरकारको लक्ष्य रहेको उल्लेख गर्दै निजी क्षेत्रको सफलता नै राष्ट्रिय अर्थतन्त्रको सफलतासँग जोडिएको बताए।

‘निजी क्षेत्रले आत्मविश्वासका साथ लगानी बढाएर उत्पादन विस्तार गर्न तयार भए मात्रै आर्थिक समृद्धिको लक्ष्य हासिल गर्न सकिन्छ। सञ्चालनमा रहेका उद्योगले आफ्नो उत्पादन क्षमता पूर्ण रूपमा उपयोग गर्नुका साथै उद्योग विस्तार र नयाँ लगानी गर्न सकून् भन्नेमा सरकार केन्द्रित छ,’ उनले भने।

उद्योग सञ्चालनका क्रममा देखिएका जग्गा, विद्युत्, ढुवानी, बजार पहुँच तथा उत्पादन लागतसँग सम्बन्धित समस्या समाधानका लागि व्यावहारिक र नीतिगत पहल गर्न अर्थ मन्त्रालय प्रतिबद्ध रहेको पनि उनले बताए।

छलफलका क्रममा चालु आर्थिक वर्षको बजेटले उद्योग क्षेत्रमा पार्ने प्रभाव, बजेट कार्यान्वयनका चुनौती तथा सरकार–निजी क्षेत्रबीच आवश्यक समन्वयका विषयमा पनि विचारविमर्श भएको थियो। कार्यक्रममा सहभागी उद्योगीहरूले उद्योग सञ्चालनका क्रममा भोगिरहेका समस्या तथा आगामी योजनाबारे मौखिक र लिखित रूपमा अर्थमन्त्रीसमक्ष आफ्ना सुझाव प्रस्तुत गरेका थिए।