सर्वदलीय बैठकको सातबुँदे वक्तव्यः अफवाह नफैलाउन र शान्ति कायम राख्न आग्रह

काठमाडौँ: राष्ट्रिय स्वतन्त्र पार्टी (रास्वपा) का सभापति रवि लामिछानेको आह्वानमा मंगलबार बसेको सर्वदलीय बैठकले सुनसरीसहित विभिन्न जिल्लामा हालै विकसित संवेदनशील घटनाक्रमप्रति गम्भीर चासो व्यक्त गर्दै सामाजिक सद्भाव, शान्ति र संवाद कायम राख्न सातबुँदे संयुक्त वक्तव्य तथा अपिल जारी गरेको छ।

बैठकले पछिल्ला घटनामा ज्यान गुमाएकाप्रति श्रद्धाञ्जली व्यक्त गर्दै शोकसन्तप्त परिवारप्रति समवेदना प्रकट गरेको छ। साथै, घाइते नागरिक र सुरक्षाकर्मीहरूको शीघ्र स्वास्थ्य लाभको कामना गरेको छ।

राजनीतिक दलहरूले नेपालको विविधताबीचको एकता, सहिष्णुता र सहअस्तित्वलाई कायम राख्न सबै नागरिकलाई उत्तेजना र अवाञ्छित गतिविधिबाट टाढा रहन आग्रह गरेका छन्। आवेग र मुठभेडले समस्या समाधान नगर्ने भन्दै शान्ति र संयमता अपनाउन अपिल गरिएको छ।

संयुक्त वक्तव्यमा लोकतान्त्रिक प्रणालीभित्र उत्पन्न हुने असन्तुष्टि र विवादको समाधान शान्तिपूर्ण संवाद र सहमतिमार्फत मात्रै सम्भव हुने उल्लेख गर्दै सम्बन्धित सबै पक्षलाई आफ्ना मागहरू शान्तिपूर्ण रूपमा राख्न आह्वान गरिएको छ।

बैठकले केन्द्रमा मात्र सीमित नभई प्रदेश, जिल्ला र स्थानीय तहमा पनि तत्काल सर्वदलीय तथा सर्वपक्षीय बैठक आयोजना गर्न आग्रह गरेको छ। स्थानीय तहमा राजनीतिक दल, धार्मिक अगुवा, नागरिक समाज र प्रशासनबीच समन्वय गरेर विश्वासको वातावरण निर्माण गर्नुपर्नेमा जोड दिइएको छ।

भविष्यमा यस्ता संवेदनशील घटना दोहोरिन नदिन राजनीतिक दलहरूले केन्द्रीय तहबाट आवश्यक समन्वय, अनुगमन र नेतृत्वदायी भूमिका निर्वाह गर्ने प्रतिबद्धता जनाएका छन्।

त्यस्तै, संवेदनशील अवस्थाको फाइदा उठाएर सामाजिक सञ्जालमार्फत फैलाइने भ्रामक सूचना, घृणास्पद अभिव्यक्ति र अफवाहले अवस्था थप जटिल बनाउन सक्ने भएकाले सामाजिक सञ्जाल जिम्मेवारीपूर्वक प्रयोग गर्न आम नागरिकलाई आग्रह गरिएको छ। सञ्चारमाध्यमलाई पनि तथ्यपरक र संयमित सूचना सम्प्रेषण गर्न अनुरोध गरिएको छ।

संयुक्त वक्तव्यमार्फत नेपाल सरकारको ध्यानाकर्षण गराउँदै नागरिकको जिउधनको सुरक्षा सुनिश्चित गर्न, अधिकतम संयमता अपनाई परिस्थितिलाई सामान्य बनाउन, घटनाको निष्पक्ष छानबिन गरी दोषीमाथि कानुनबमोजिम कारबाही गर्न तथा पीडितलाई उचित राहत र क्षतिपूर्ति उपलब्ध गराउन माग गरिएको छ।

बैठकमा सहभागी राजनीतिक दलहरूले राष्ट्रिय एकता र सामाजिक सद्भावको रक्षा गर्न आफूहरू एकताबद्ध रहेको सन्देश दिँदै उत्पन्न समस्याको दिगो, प्रभावकारी र शान्तिपूर्ण समाधानका लागि सरकार तथा समाजसँग सहकार्य गर्ने प्रतिबद्धता व्यक्त गरेका छन्।