नेप्सेमा लगातार तेस्रो दिन गिरावट, कारोबार रकम पनि घट्यो

काठमाडौँः साताको पहिलो कारोबार दिन सोमबार नेपाल स्टक एक्सचेन्ज (नेप्से) परिसूचक घटेर बन्द भएको छ। पछिल्ला दुई कारोबार दिनदेखि निरन्तर ओरालो लागेको नेप्सेले सोमबार पनि गिरावटलाई निरन्तरता दिएको हो। सोमबार नेप्से परिसूचक ९.०४ अंकले घटेर २ हजार ६४१.०५ विन्दुमा झरेको छ।

नेप्सेसँगै सोमबार कारोबार रकम पनि घटेको छ। गत शुक्रबार ३ अर्ब ७७ करोड रुपैयाँ बराबरको कारोबार भएकोमा सोमबार घटेर ३ अर्ब ६७ करोड ४४ लाख रुपैयाँ बराबरको सेयर कारोबार भएको छ।

यस दिन ३५२ वटा स्टकको १ करोड ९ लाख ६६ हजार कित्ता सेयर खरिद–बिक्री भएको छ। सोमबार कारोबारमा आएका कम्पनीमध्ये कर्पोरेट डेभलपमेन्ट बैंकको सेयरमूल्य सर्वाधिक ८.४७ प्रतिशतले बढेको छ। साथै, कारोबारमा आएको रिलायबल समृद्धि योजना–२ को इकाई मूल्य सर्वाधिक ९.७० प्रतिशतले घटेको छ।

कारोबार रकमका आधारमा सोमबार सोलु हाइड्रोपावर शीर्ष स्थानमा रहेको छ। कम्पनीको ४६ करोड ३७ लाख रुपैयाँ बराबरको सेयर कारोबार भएको छ।