भोटेकोसी बाढीले एक दर्जन आयोजनामा ठूलो क्षति, ४३१ मेगावाट बिजुली उत्पादन बन्द

काठमाडौं। तिब्बतको भोटेकोसीमा हिमपहिरो फुटेर आएको भीषण बाढीले रसुवा जिल्लामा सञ्चालनमा रहेका सबै जलविद्युत आयोजना बन्द भएका छन्। बाढीका कारण ४३१ मेगावाट बिजुली आपूर्ति बन्द भएको छ।

११ जलविद्युत र एक २५ मेगावाटको सोलार परियोजना भएको ऊर्जा जलस्रोत तथा सिंचाइ मन्त्रालयले जनाएको छ। यसरी बन्द हुने आयोजनाहरुमा १११ मेगावाटको रसुवागढी, ७८ मेगावाटको सलासुली (सान्जेन) १४.८ मेगावाटको माथिल्लो सान्जेन, ४२.५ मेगावाटको तल्लो सान्जेन र २२ मेगावाटको चिलिमे जलविद्युत आयोजनामा ठूलो क्षति हुँदा बिजुली उत्पादन बन्द भएको हो।

यसैगरी २० मेगावाटको लाङटाङ जलविद्युत आयोजना, ६० मेगावाटको माथिल्लो त्रिशूली ३ ए, १४.८ मेगावाटको माथिल्लो मैलुङ, ५ मेगावाटको मैलुङ, २४ मेगावाटको त्रिशूली, १४ मेगावाटको देविघाट र २५ मेगावाटको सोलार परियोजना बन्द भएको मन्त्रालयले जनाएको छ।

बाढीले निर्माणाधीन प्रत्यक्ष वैदेशिक लगानीका ठूला आयोजनाहरूमा समेत ठूलो धक्का पुर्याएको छ। कोरियाली लगानीमा निर्माणाधीन २१६ मेगावाट क्षमताको माथिल्लो त्रिशूली–१ जलविद्युत् आयोजनाका भौतिक संरचनाहरू बाढीका कारण क्षतिग्रस्त भएका छन्।

त्यसैगरी, १२० मेगावाटको रसुवा–भोटेकोशी जलविद्युत् आयोजनाको मुख्य संरचना तथा पहुँचमार्गमा क्षति पुगेको छ भने ६.४२ मेगावाट क्षमताको निर्माणाधीन माथिल्लो मैलुङ–ए आयोजना पनि बाढीका कारण प्रभावित भएको छ। यसरी निर्माणाधीन ३४२ मेगावाट क्षमताका तीन आयोजनामा प्रत्यक्ष क्षति पुगेको प्रारम्भिक विवरणले देखाएको छ।

जिल्लामा आएको आकस्मिक बाढीले नेपाल विद्युत् प्राधिकरणका उत्पादन, प्रसारण तथा वितरण संरचनामा क्षति पुगेपछि विद्युत् आपूर्ति अवरुद्ध भएको नेपाल विद्युत प्राधिकरणले जानकारी दिएको छ।

प्राधिकरणका अनुसार बाढीबाट रसुवागढी, चिलिमे, त्रिशूली–३ ‘ए’, त्रिशूली–३ ‘बी’ हब, २२० केभी सबस्टेशन, त्रिशूली तथा देवीघाट जलविद्युत् केन्द्र र विभिन्न वितरण संरचनामा क्षति पुगेको प्रारम्भिक जानकारी प्राप्त भएको छ।

बाढीका कारण जनधनसँगै घर, सडक, पुल, विद्युत् तथा अन्य भौतिक संरचनामा समेत उल्लेख्य क्षति पुगेको प्राधिकरणले जनाएको छ।

प्राधिकरणले प्रभावित क्षेत्रमा बेपत्ता तथा प्रभावित सुरक्षाकर्मी, राष्ट्रसेवक कर्मचारी र सर्वसाधारणको खोज, उद्धार, राहत तथा पुनःस्थापनाका लागि सम्बन्धित सबै पक्षलाई तत्काल प्रभावकारी रूपमा परिचालित भई सहयोग गर्न आग्रह गरेको छ।

नदी तथा खोलाको आसपास, तटीय क्षेत्र र जोखिमयुक्त स्थानमा रहेका नागरिक तथा प्राधिकरणका कर्मचारीलाई उच्च सतर्कता अपनाउन र थप जोखिम देखिए सुरक्षित स्थानमा स्थानान्तरण हुन समेत अनुरोध गरिएको छ। प्राधिकरणले आधिकारिक सूचना बाहेकका अपुष्ट समाचार र अफवाहमा विश्वास नगर्न पनि आग्रह गरेको छ।

विद्युत् आपूर्ति नियमित बनाउन हरसम्भव प्रयास भइरहेको जनाउँदै प्राधिकरणले आपूर्ति पूर्ण रूपमा नियमित नहुँदासम्म धैर्य गर्न र सोहीअनुसार सूचना प्रवाह गर्न सम्बन्धित सबैमा अनुरोध गरेको छ।