थालनीको पहलमा ९८ हजार रूपैयाँ प्रधानमन्त्री कोषमा

काठमाडौं/भोटेकोशी बाढीबाट पीडितहरूका लागि राजनीतिक संवाद थालनीका तर्फबाट ९८ हजार रूपैयाँ प्रधानमन्त्री राहत तथा उद्धार कोषमा जम्मा गरिएको छ।

थालनीका सदस्यहरू र नागरिक स्तरबाट विभिन्न व्यक्तिहरूको ऐक्यबद्धतामा ९८ हजार ८१६ रूपैयाँ प्रधानमन्त्री विपद् कोष मा सङ्कलन/जम्मा गरेको थालनीका सदस्य प्रमोद धितालले जानकारी दिए।

उद्धार, राहत र पुनःस्थापनाको काम यथासक्य छिटो र अझ प्रभावकारी ढङ्गले हुन सकोस् भनी आफूहरूले सक्दो सहयोग गरेको उनले बताए। प्राकृतिक दोहन, पर्यावरणीय विनाश र अन्य मानवसिर्जित सङ्कटबाट पृथ्वी र मानव सभ्यता नै कसरी जोगाउने भन्ने प्रश्नमा सबै गम्भीर हुन पनि थालनीले अपिल गरेको छ।

“सङ्कट परेको छ मान्छेलाई मान्छेहरू नै फेरि जुटौं ! यो महाविपत्तिबाट निस्कन हातेमालो गर्दै उठौं !” भन्ने नारासहित भदौ १० मा आएको भोटेकोशी बाढीका पीडितहरूका लागि उद्धार र राहतमा जुट्न थालनीले अपिल पनि गरेको छ।

“भदौ १० मा एकै झड्कामा सयौं मान्छेको ज्यान लिएको छ भने अरू हजारौंको जीवनमा अकल्पनीय पीडा थपेको छ। अझै हजारौंहजार बेपत्ता अवस्थामा हुनुहुन्छ। एउटै घटनाले हजारौंलाई घरबारविहीन र परिवारविहीन बनाएको छ। अर्बौंअर्बको भौतिक सम्पत्ति र पूर्वाधार तहसनहस पारेको छ। यो घटना नेपालको मात्रै होइन, विश्वइतिहासमै भयावह विपत्ति हो। नेपालको त समग्र सामाजिक जीवनमै यो महाविपत्तिले दशकौंसम्म गहिरो प्रभाव छाड्नेछ। यस्तो महासङ्कटको घडीमा जो जहाँ छौं, त्यहींबाट सक्दो मानवीय सहयोग गर्नु र राहत तथा उद्धारमा ऐक्यबद्धता जनाउनु हामी सबैको कर्तव्य हो।” वक्तव्यमा भनिएको छ।

मानव जातिले फेरि यसप्रकारको विपद् झेल्न नपरोस् भनी राहत, पुनःस्थापना र अरू मानवीय सहयोग र सेवामा जुटिरहने पनि थालनीले जनाएको छ। थालनीमा

थालनीमा लोकेन्द्र विष्ट, संगीत श्रोता, वन्दना ढकाल, प्रमोद धिताल, नुमेश घर्तीमगर, कुमार उपाध्याय, अमृत विश्वकर्मा, कपिल अधिकारी, तुल्सीदास महर्जन, पार्वती उपाध्याय, घनश्याम अस्तित्व, बलराम तिमिल्सिना, देवीप्रसाद ढकाल, रीता सुवेदी, दीपा शर्मा, श्रद्धा धिताल र लेखराज रेग्मीले सहयोग गरेका हुन्।