शुक्रबार १८ अर्ब निक्षेप संकलन गर्दै राष्ट्र बैंक

काठमाडौँः बैंकिङ प्रणालीमा रहेको अतिरिक्त तरलता व्यवस्थापन गर्न नेपाल राष्ट्र बैंकले आज (शुक्रबार) १८ अर्ब रुपैयाँ बराबरको निक्षेप संकलन उपकरण निष्कासन गर्ने भएको छ। केन्द्रीय बैंकले २८ दिन अवधिको ‘१ महिने निक्षेप संकलन उपकरण’ बोलकबोलमार्फत निष्कासन गर्न लागेको हो।

राष्ट्र बैंकका अनुसार बैंक तथा वित्तीय संस्थाबाट अतिरिक्त रकम आफ्नो प्रणालीमा तान्ने उद्देश्यले यो उपकरण प्रयोग गर्न लागिएको हो। यसबाट बैंकिङ प्रणालीमा तत्काल उपलब्ध तरलताको केही हिस्सा राष्ट्र बैंकमा जानेछ।

निक्षेप संकलन उपकरणका लागि असोज १६ गते दिउँसो ३ बजेसम्म बोलकबोल गर्न सकिनेछ। इच्छुक बैंक तथा वित्तीय संस्थाले राष्ट्र बैंकको अनलाइन बिडिङ सिस्टम मार्फत मात्र बोलपत्र पेस गर्नुपर्नेछ।

उपकरण असोज १६ गते नै निष्कासन हुनेछ भने यसको साँवा तथा ब्याज कात्तिक १३ गते भुक्तानी गरिनेछ। यसको ब्याजदर भने प्रतिस्पर्धात्मक बोलकबोलबाट निर्धारण हुनेछ। सहभागी संस्थाले बहु(ब्याजदरमा समेत बोल पेस गर्न सक्नेछन्।

१८ अर्ब रुपैयाँको उपकरण बाँडफाँड गर्दा कम ब्याजदर प्रस्ताव गर्ने बोलवालालाई पहिलो प्राथमिकता दिइनेछ। समान ब्याजदरमा प्राप्त बोल रकम कुल निष्कासन रकमभन्दा बढी भएमा उपलब्ध रकमलाई प्रो-राटा आधारमा बाँडफाँड गरिनेछ।

यस प्रक्रियामा राष्ट्र बैंकबाट इजाजतपत्र प्राप्त ‘क’, ‘ख’ र ‘ग’ वर्गका बैंक तथा वित्तीय संस्था सहभागी हुन पाउनेछन्। एउटा संस्थाले न्यूनतम १० करोड रुपैयाँदेखि अधिकतम १८ अर्ब रुपैयाँसम्म, १० करोडले भाग जाने गरी बोल गर्न सक्नेछ।