व्यवसायी रुप ज्योति संकटमा, ऋण नतिरेपछि हिमालयन बैंकले दियो ‘अल्टिमेटम’

काठमाडौँ: मुलुककै पुरानो व्यावसायिक घराना ज्योति ग्रुप अहिले गहिरो आर्थिक संकटमा परेको छ। दाजु पद्म ज्योति र भाइ रूप ज्योतिबीच अंश विवादले चर्को रूप लिएपछि वित्तीय संकट झन गहिरिँदै गएको हो।

ऋण नतिरपछि विभिन्न बैंकले सूचना प्रकाशित गर्न थालेका छन्। यस्तै हिमालय वायर्स प्रालिले लिएको ऋण नतिरेपछि हिमालयन बैंकले रूप ज्योतिलाई ३५ दिनको ‘अल्टिमेटम’ दिएको छ। उक्त समयभित्र ऋण चुक्ता नगरे सम्पत्ति लिलाम गरेर असुल गर्ने चेतावनी बैंकले दिएको छ।

बैंकको सीटीसी शाखा सुन्धाराबाट लिएको कर्जाको समय समयमा बुझाउन पर्ने साँवा ब्याज नतिरी कर्जासम्बन्धी शर्त बन्देज उल्लंघनको तथा पटक पटक लिखित तथा मौसिक तरताकेता गर्दासमेत ऋण चुक्ता नगरेकाले ३५ दिनको समय दिएको जनाएको छ।

उक्त समयभित्र चुक्ता नगरे ऋणी र बैंकबीच भएको सम्झौताअनुसार कारबाही गरी कालोसूचीमा राखेर असूलका लागि कानुनी कारवाही अगाडी बढाइने चेतावनी बैंकले दिएको छ।

व्यक्तिगत जमानी दिने अभिक ज्योति, सुरुची ज्योति र रूप ज्योतिका साथै १५ प्रतिशत बढी सेयर धारणा गर्ने हिमाल आइरन एन्ड स्टिल प्रालि र कमला कंसाकार रहेको बैंकले जनाएको छ। कान्तिपथमा रहेको जग्गा धितोमा रहेको बैंकले जनाएको छ।

ऋण नतिरेपछि व्यवसायी रूप ज्योतिको सम्पत्ति लिलाम गर्दै प्रभु बैंक

यसअघि व्यवसायी रूप ज्योतिले ऋण नतिरेपछि गत साउनको पहिलो साता प्रभु बैंकले धितोमा राखेको सम्पत्ति लिलामीको प्रक्रिया अघि बढाएको थियो।

साविकको सेञ्चुरी कमर्सियल बैंक (हाल प्रभु बैंकमा समाहित) बाट लिएको ऋण नतिरेपछि लिलामीको प्रक्रिया अघि बढाएको थियो। ज्योतिले नर्थ फेस होटल प्रालि र नेपाल जनरल मार्केटिङ प्रालिले लिएको ऋण नतिरेको बैंकले जानकारी दिएको थियो।

हिरो मोटरसाइकल डिलर खोसिएपछि नेपाल बैंकले २०८१ मंसिरमा ऋण तिर्न रूप ज्योतिलाई ताकेता गरेको थियो। हिरोको नेपाल डिलर, नेपाल जनरल मार्केटिङ र ग्राण्डी सिटी हस्पिटलको सम्पत्ति नेपाल बैंकले लिलाम गर्न चेतावनी बैंकले दिएको। यि दुबै सम्पत्ति रूप ज्योतिको हो।

अंश विवाद भएपछि ज्योति ग्रुपमा विभाजन

रूप ज्योति र पद्म ज्योति दाजुभाईबीच लामो समयदेखि अंश विवाद छ। नेपाल जनरल हिरो होन्डा मोटरसाइकलको अधिकृत बिक्रेता थियो।

हिरोको डिलरसिप खोसिएपछि ज्योति संकटमा परेका हुन्। हिरो मोटरसाइकल हाल चौधरीको सीजी मोटरले बिक्री गर्दै आएको छ। दाजुभाइबीचको अंश झगडाले मणिहर्ष ज्योतिले बनाएको १२२ वर्ष पुरानो साम्राज्य अहिले संकटमा छ। झगडाका कारण समूहको बिजनेस विस्तार हुनुको साटो खुम्चिँदै गएको छ।

पारिवारिक उद्योगी घराना ज्योति ग्रुप औपचारिक रूपमा अलग भएको छ। ज्योति ग्रुपमा दुई भाइको झगडा सुरू भएसँगै २०८१ मंसिरमा पद्म ज्योतिले पद्म ज्योति ग्रुप स्थापना गरि ब्रान्डिङ सुरू गरेका छन्।

सम्पत्ति बाँडफाँट र आफ्ना कम्पनीहरूमाथिको नेतृत्व विवादले यो समूह अलग भएको हो। भाइ रूप ज्योतिसँगको विवादपछि पद्म ज्योतिले अलग्गै समूह सुरु गरेका छन्।पद्म नेपाल उद्योग वाणिज्य संघका पूर्वअध्यक्ष हुन्।

१२२ वर्षअघि ज्योति ग्रुप सुरु भएको हो। नेपालमा पहिलो डन्डी उद्योग, पहिलो सिमेन्ट उद्योग सुरू गरेको थियो। समूहको हिमाल स्टिल, अटोमा होन्डा, बैंक तथा वित्तीय संस्थाहरूमा लगानी छ।

समूहको सम्पत्तिमा पद्मको ३३, रूपको ३३ र एक अविवाहित कमलाको ३३ प्रतिशत हिस्सा रहेको छ। बैंनी कमलाले आफ्नो पक्षमा भएपछि अहिले समूहको बहुमत स्वामित्व रूप ज्योतिको हातमा छ।