एनएमबी बैंकको २ लाख ७८ हजारभन्दा बढी संस्थापक सेयर बिक्रीमा

काठमाडौँः एनएमबी बैंक लिमिटेडका संस्थापक सेयरधनी पशुपति भेन्चर लिमिटेडले आफ्नो स्वामित्वमा रहेको २ लाख ७८ हजार ४६० कित्ता संस्थापक सेयर बिक्री गर्ने भएको छ। उक्त सेयर खरिद गर्न इच्छुक बैंकका विद्यमान संस्थापक सेयरधनीलाई ३५ दिनभित्र शिलबन्दी दरभाउ पेश गर्न आह्वान गरिएको छ।

बैंकको सञ्चालक समितिको निर्णयअनुसार सेयर बिक्री प्रक्रिया अघि बढाइएको हो। प्रचलित कानुनी व्यवस्था तथा नेपाल राष्ट्र बैंकको एकीकृत निर्देशनअनुसार संस्थापक सेयर बिक्री गर्दा पहिलो प्राथमिकता बैंकका विद्यमान संस्थापक सेयरधनीलाई दिनुपर्ने व्यवस्था छ।

बिक्रीमा राखिएको २,७८,४६० कित्ता सेयर आंशिक रूपमा खरिद गर्न पाइने छैन। इच्छुक संस्थापक सेयरधनीले सम्पूर्ण कित्ता एकमुष्ट खरिद गर्ने गरी प्रतिकित्ता प्रस्तावित मूल्य खुलाएर गोप्य शिलबन्दी दरभाउपत्र पेश गर्नुपर्नेछ।

शेयर खरिदका लागि आवेदन दिँदा आवश्यक कागजातसमेत संलग्न गर्नुपर्नेछ। आवेदकले नागरिकता वा संस्था दर्ता प्रमाणपत्र, स्थायी लेखा नम्बर (प्यान), पछिल्लो आर्थिक वर्षको कर चुक्ता प्रमाणपत्र, लगानीको वैधानिक स्रोत खुल्ने प्रमाण तथा कर्जा सूचना केन्द्रको कालोसूचीमा नरहेको स्वघोषणालगायतका कागजात बुझाउनुपर्नेछ। संस्थागत आवेदकले सञ्चालक समितिको निर्णय र अख्तियारीसमेत पेश गर्नुपर्नेछ।

सेयर बिक्री प्रक्रियाको बिक्री प्रबन्धक एनएमबी क्यापिटल लिमिटेड रहेको छ। इच्छुक संस्थापक सेयरधनीले आवश्यक कागजातसहित तोकिएको समयसीमाभित्र बालुवाटार–४, काठमाडौंस्थित एनएमबी क्यापिटलमा शिलबन्दी दरभाउपत्र पेश गर्न सक्नेछन्।

तोकिएको ३५ दिनभित्र विद्यमान संस्थापक सेयरधनीबाट आवेदन नपरेमा वा खरिद–बिक्रीका लागि आपसी सहमति कायम हुन नसकेमा प्रचलित कानुनबमोजिम अन्य व्यक्ति तथा संघसंस्थालाई शेयर बिक्री गर्न आवश्यक प्रक्रिया अघि बढाइने सूचनामा उल्लेख छ।

यससँगै विद्यमान संस्थापक शेयरधनीबाट खरिद प्रक्रिया पूरा नभएमा कानुनी प्रावधानअनुसार बाह्य लगानीकर्तालाई समेत संस्थापक शेयर खरिद गर्ने बाटो खुल्न सक्नेछ।