प्रधानमन्त्री राहत कोषमा सहयोग जुट्ने क्रम जारी, १८ अर्बभन्दा बढी मौज्दात

काठमाडौँः रसुवाको भोटेकोशी नदीमा आएको बाढीपछि प्रधानमन्त्री दैवी प्रकोप उद्धार कोष तथा प्रधानमन्त्री राहत कोषमा आर्थिक सहयोग थपिने क्रम जारी छ । पछिल्लो विवरणअनुसार कोषमा जम्मा मौज्दात रकम १८ अर्ब रुपैयाँभन्दा माथि पुगेको छ ।

प्रधानमन्त्री तथा मन्त्रिपरिषद्को कार्यालयका अनुसार सोमबार बिहान ९ बजेसम्म विभिन्न बैंकका खातामा गरी कोषको मौज्दात १८ अर्ब ९ करोड ३२ लाख ३६ हजार ८५२ रुपैयाँ पुगेको हो ।

उपलब्ध विवरणअनुसार विभिन्न नौवटा वाणिज्य बैंकमा रहेको नेपाली रुपैयाँतर्फको मौज्दात १३ अर्ब ४८ करोड ४ लाख २९ हजार ६४ रुपैयाँ छ ।

यस्तै, हिमालयन बैंक र लक्ष्मी सनराइज बैंकमा रहेको विदेशी मुद्राको मौज्दात ३ करोड ४ लाख ९१ हजार ४४४ अमेरिकी डलर रहेको छ ।

भोटेकोशी बाढीपछि राहत तथा उद्धारका लागि सरकारी कोषमा सहयोग जुटिरहेको भए पनि हालसम्म संकलित रकमको ठूलो हिस्सा बैंक खातामै मौज्दात रहेको देखिन्छ । अब राहत कोषमा जम्मा भएको यो रकम बाढी प्रभावितको उद्धार, राहत, पुनर्स्थापना तथा आवश्यक पूर्वाधार निर्माणमा कसरी र कति खर्च हुन्छ भन्ने विषय महत्वपूर्ण बनेको छ।

कोषमा रकम थपिँदै जाँदा त्यसको परिचालन, खर्चको पारदर्शिता र प्रभावित क्षेत्रमा वास्तविक लाभ पुग्ने विषयमा पनि चासो बढेको छ ।