लामा नेतृत्वको यूएनडीओले पायो वैधानिकता, एनआरएनएका समानान्तर संस्था दर्ता गर्ने बाटो खुला

काठमाडौँ– सर्वोच्च अदालतले गैरआवासीय नेपाली संघ (एनआरएनए)को समानान्तर संस्था दर्ता गर्न परराष्ट्र मन्त्रालयलाई आदेश दिएको छ। एनआरएनएका पूर्वउपाध्यक्ष सोनाम लामाको अध्यक्षतामा गठन भएको युनाइटेड नेपाली डायस्पोरा अर्गनाइजेसन (यूएनडीओ) दर्ता गर्न सर्वोच्चले परराष्ट्र मन्त्रालयलाई आदेश दिएको हो।

एनआरएनएको गत निर्वाचनमा विवाद भएपछि लामाले नेपाली मूलका विदेशी नागरिक मात्रै रहने गरी यूएनडीओ दर्ताका लागि परराष्ट्र मन्त्रालयमा निवेदन दिएका थिए। तर परराष्ट्र मन्त्रालयले सो संस्था दर्ता गर्न नमानेपछि लामाले सर्वोच्च अदालतमा रिट निवेदन हालेका थिए। सोही रिटमाथि सुनुवाई गर्दै सर्वोच्चका न्यायाधीशद्वय आनन्दमोहन भट्टराई र तीलप्रसाद श्रेष्ठको संयुक्त इजलासले युएनडीओ दर्ता गर्न आदेश दिएको हो।

गैरआवासीय नेपाली संघमा तीन जना अध्यक्ष बनाइएपछि लामासहितका नेताहरू विपक्षमा खडा भएका थिए। गैरआवासीय नेपाली भनेको नेपाली मूलका विदेशी नागरिक वा विदेशमा स्थायी बसोबासको अनुमति पाएका मात्रै (पिपुल अफ नेपाली ओरिजिन– पीएनओ) हुनुपर्ने भन्दै सोनाम लामाले आवाज उठाउँदै आएका थिए।

२०७९ वैशाख ६ गते यूएनडीओ दर्ताका लागि २८ मुलुकका ५८ जना गैरआवासीय नेपालीहरुले संयुक्त रुपमा दर्ताको निवेदन दिएका थिए। सोनामको पक्षमा गैरआवासीय नेपाली संघका पूर्वअध्यक्ष शेष घले पनि छन्। सर्वोच्चले आफूहरुको पक्षमा फैसला गरेकाले त्यसअनुरुप यूएनडीओ दर्ता गरेर अघि बढ्ने लामाले बताए।