चितवनमा साढे ४० हजार सवारी चालकमाथि कारबाही

चितवन– गत आर्थिक वर्ष २०७९/८० मा ट्राफिक नियम उल्लंघन गर्ने ४० हजार ६ सय ६४ सवारीसाधनका चालकलाई कारबाही गरिएको छ। चालकलाई कारबाही गर्ने क्रममा ३ करोड ४५ लाख ३८ हजार राजस्व संकलन भएको छ। मादक पदार्थ सेवन गरी सवारीसाधन चलाउने, क्षमताभन्दा बढी यात्रु राखेर सञ्चालन गर्ने, निषेधित क्षेत्रमा सवारी पार्किङ गर्ने, तीव्र गतिमा सवारी चलाउनेलगायत ट्राफिक नियम उल्लंघन गर्ने चालकलाई कारबाही गरिएको हो।

कारबाहीमा पर्नेमा ट्रक तथा टिपरका चालक ७ हजार ७५, बस तथा माइक्रोबसका चालक ४ हजार एक सय ९४, जिप तथा कारका चालक ७ हजार सात सय १२, ट्रयाक्टर चालक १ हजार ६ सय ९, मोटरसाइकल तथा स्कुटर चालक १३ हजार एक सय सात र टेम्पो तथा अटोरिक्सालगायत सवारीसाधनका चालक ६ हजार ९ सय ६७ रहेका जिल्ला ट्राफिक कार्यालयका प्रमुख प्रहरी निरीक्षक राजकुमार तामाङले जानकारी दिए।

गत आवमा तीन सय तीन सवारीसाधन दुर्घटनामा परेका थिए। सो क्रममा ७८ जनाको मृत्यु भएको थियो। ती दुर्घटनामा एक सय ७० जना गम्भीर र ४ सय ११ जना सामान्य घाइते भएको उनले बताए। सबैभन्दा बढी जिल्लाका भित्री सडकमा एक सय ४१, पूर्व–पश्चिम राजमार्गमा ६४, नारायणगढ–मुग्लिन सडक खण्डमा ५७, पृथ्वी राजमार्गमा २३ र जिल्लाका सहरी सडक खण्डमा १८ सवारीसाधन दुर्घटनामा परेको ट्राफिक प्रहरीले जनाएको छ।