बजेटको व्यवस्थालाई प्रचण्डको निर्देशन भन्दै अनावश्यक हो-हल्ला

काठमाडौँ- केही दिन अघि नेपाली राष्ट्रिय क्रिकेट टिमले युएईलाई हराउँदै आईसीसी विश्वकप लिग-२ को तेस्रो स्थानमा रहँदै सिधै ग्लोबल छनोटमा आफ्नो स्थान बनायो। त्यसपछि नेपाली सरकारले विजयी खेलाडीलाई तीन तीन लाख पुरस्कारको घोषणा गरेको छ। यसकारण अहिले क्रिकेट खेलाडीलाई पुरस्कार दिने होडबाजी देशभर छ।

यस्तै, चर्चामा रहेको विषय हो त्रिवि क्रिकेट मैदानमा फ्लडलाइट जडानको विषय पनि। प्रधानमन्त्री पुष्पकमल दहाल प्रचण्डले फ्लड लाइट हाल्नको लागि निर्देशन दिएको भन्दै अहिले सामाजिक सञ्जालमा उनको बडाइ चढाई गरी प्रचार गरिँदै आएको छ।

त्रिवि मैदानमा फ्लड लाइट हाल्ने विषय नयाँ भने होइन। यो विषय चालु आर्थिक वर्षकै बजेटमा व्यवस्था भएको कुरा हो। यो आर्थिक वर्ष २०७९/८० को बजेटको बुँदा १९६ मै यो कुरा प्रष्टसँग लेखिएको छ।

‘कीर्तिपुर अन्तर्राष्ट्रिय क्रिकेट स्टेडियममा रात्रिकालिन खेल खेलन सकिने गरी स्तरोन्नति गर्न आवश्यक रकम विनियोजन गरेको छु,’ बजेटमा लेखिएको छ। त्यति मात्र नभएर बजेटमा त मूलपानी रंगशालाको निर्माणकार्य यो वर्षमै सकिने भन्ने कुरा पनि उल्लेख गरिएको छ।

त्रिवि मैदानमा फ्लड लाइट हाल्ने विषय नयाँ भने होइन। यो विषय चालु आर्थिक वर्षकै बजेटमा व्यवस्था भएको कुरा हो। यो आर्थिक वर्ष २०७९/८० को बजेटको बुँदा १९६ मै यो कुरा प्रष्टसँग लेखिएको छ।

त्रिवि क्रिकेट मैदानमा फ्लडलाइट राख्नको लागि नेपाल क्रिकेट संघ क्यानले राष्ट्रिय खेलकुद परिषद्को पहलमा लामै समयदेखि मन्त्रालय र मन्त्रिपरिषद्लाई गहिरिरहेको थियो। त्यसैले अघिल्लो पटकका युवा तथा खेलकुदमन्त्री महेश्वर गहतराज ‘अथक’ले नै त्रिवि मैदानमा गएको मंसिरसम्ममै फ्लड लाइट जडान सम्पन्न हुने बताएका थिए।

यता नेपाल क्रिकेट संघ (क्यान)का पदाधिकारी पनि सो अवधिमा फ्लड लाइट जडान हुनेमा ढुक्क थिए। तर सरकारी ढिलासुस्तीका कारण काम भएन। अहिले भने बजेटमा उल्लेख भएर काम सकिइसक्नु पर्ने अवस्थासम्म पनि काम नहुँदा प्रधानमन्त्रीले प्रचण्डले नै यो काम गर्न लागाएका हुन् भनेर देखाउने माओवादी कार्यकर्ता उद्यत देखिन्छन्।

यस्तैमा प्रचण्डकी छोरी गंगा दहालले त्रिवि मैदानमा फ्लड लाइट जोडिएको भन्दै अफवाह नै फैलाइन्। उनले सामाजिक सञ्जालमा त्रिवि मैदानमा लाइट जोडिएको भनेर डिजाइन गरिएको तस्विर राख्दै आफ्ना पिता प्रचण्डलाई धन्यवाद दिन दिइसकेकी छन्। तर उनको त्यो पोस्टको आलोचना हुन लागेपछि फेसबुक पोस्ट सच्याएकी छन्।

आइतबार दिउँसो ३:१६ मा  गंगाले लेखेको स्टाटमा कीर्तिपुर क्रिकेट मैदानमा फ्लड लाइट जडान भइसकेको उल्लेख छ। ‘सम्माननीय प्रधानमन्त्री प्रचण्डको निर्देशनमा कीर्तपुर क्रिकेट मैदानमा फ्लड लाइट जडान कार्य सम्पन्न,’ उनको उक्त पोस्टमा लेखिएको छ। पोस्टमा मैदानमा फल्ड लाइट जडान गरिएको झल्को दिने गरी फोटोसप गरी बनाइएको तस्बिर पनि राखिएको छ। तर अफवाह फैलाएको भन्दै आलोचना भएपछि गंगाले ३:४२ मा पोस्टलाई ‘एडिट’ गरेकी छन्।

सरकारले आर्थिक वर्ष २०७९–०८० को बजेटमा कीर्तिपुर मैदानमा फ्लडलाइट जडानका लागि १० करोड रुपैयाँ विनियोजन गरेको छ। दशरथ रंगशाालमा यो काम चीनले गरिदिएको थियो।