चन्द्रमामा पुगेर भारतले बनायो इतिहास

नयाँदिल्ली– चन्द्रमामा पुगेर भारतले नयाँ इतिहास रचेको छ। भारतले प्रक्षेपण गरेको चन्द्रयान–३ ले चन्द्रमामा सफलतापूर्वक सफ्ट ल्यान्डिङ गरेको हो।

चन्द्रमाको सतहमा सफलतापूर्वक अवतरण गर्ने देशको सूचीमा भारत चौथो बनेको छ। यसअघि अमेरिका, रुस र चीन चन्द्रमामा पुगिसकेका थिए। बुधबार साँझ भारतले चन्द्रमामा पुगेर इतिहास बनाएको हो।

भारतीय समयअनुसार साँझ ६ बजेर ३ मिनेटमा चन्द्रयानले चन्द्रमाको सतहमा टेकेको इन्डियन स्पेस रिसर्च अर्गनाइजेसन (इसरो)ले जनाएको छ।

‘चन्द्रयान–३’ चन्द्रमामा अवतरण गरेको ठाउँबाट करिब १०० किलोमिटर टाढा रुसीयान ‘लुना २५’ले अवतरण गरेको थियो।

‘चन्द्रयान–२’ अभियानको अनुभवले ‘चन्द्रयान–३’ अवतरणमा धेरै सहयोग गरेको इसरोले जानकारी दिएको छ। यसअघि भारतले प्रक्षेपण गरेको चन्द्रयान-२ असफल बनेको थियो।

जुलाई १४ मा चन्द्रयान-३ प्रक्षेपण भएको थियो।

Chandrayaan-3 Mission:
‘India🇮🇳,
I reached my destination
and you too!’
: Chandrayaan-3

Chandrayaan-3 has successfully
soft-landed on the moon 🌖!.

Congratulations, India🇮🇳!#Chandrayaan_3#Ch3

— ISRO (@isro) August 23, 2023

चन्द्रयान-३ चन्द्रमाको दक्षिणी ध्रुवको सबैभन्दा नजिक अवतरण भएको अन्तरिक्षयान हो। यति नजिकै यसअघि कुनै पनि देशले पठाएका अन्तरिक्ष यान पुग्न सकेका थिएनन्।

चन्द्रयान–३ को चन्द्रमामा सफल अवतरणपछि इसरोका प्रमुख एस सोमनाथले अभियान सफल भएको घोषणा गरे। यसपछि उनले प्रधानमन्त्री मोदीलाई बोल्न निम्तो दिए। ब्रिक्स सम्मेलनमा भाग लिन दक्षिण अफ्रिका गएका प्रधानमन्त्री नरेन्द्र मोदीले भर्चुअल सम्बोधन गरे।

‘जब हामी हाम्रो आँखा अगाडि यस्तो इतिहास बनिरहेको देख्छौं, जीवन धन्य लाग्छ। त्यस्ता ऐतिहासिक घटनाहरू राष्ट्रको जीवनको चेतना बन्छन्। यो क्षण अविस्मरणीय छ,’ प्रधानमन्त्री मोदीले थपे, ‘यो पल अभूतपूर्व छ। यो पल विकसित भारतको शाखानादको हो। यो पल नयाँ भारतको जयघोषको हो। यो पल कठिनाइको सागर पार गरिएको क्षण हो। यो पल विजयको हो। १ अर्ब ४० करोड मानिसको धड्कनको शक्तिको हो। यो क्षण भारतमा नयाँ ऊर्जा र नयाँ चेतनाको हो।’

यसका लागि इसरोले धेरै वर्ष मेहनत गरेको भन्दै उनले धन्यवाद दिए। वैज्ञानिकहरूको कडा परिश्रम र प्रतिभाको कारण चन्द्रमाको दक्षिणी ध्रुवमा पुगेका बताएका उनले अब चन्द्रमासँग सम्बन्धित मिथक फेरिने विश्वास व्यक्त गरे।