अजिरकोट गाउँपालिकाले सुरु गर्‍यो अनलाइन घटना दर्ता

गोरखा- गोरखाको अजिरकोट गाउँपालिकाले घरबाटै व्यक्तिगत घटना दर्ता गर्न सकिने व्यवस्था मिलाएको छ। गाउँपालिकाले चालु आर्थिक वर्ष २०८०/८१ देखि गाउँपालिकाभित्रका सबै नागरिकले घरमै बसेर अनलाइनबाटै व्यक्तिगत घटना दर्ता गर्नसक्ने व्यवस्था गरेको हो।

गाउँपालिकाका अध्यक्ष दीपक देवकोटाले अनुसार जन्म, मृत्यु, बसाइसराइ, विवाह, सम्बन्धविच्छेदलगायत घटना घरबाटै गर्न सकिने बताए। ‘अब वडा कार्यालयमा धाउनु पर्दैन, अनलाइनमार्फत नै घटना दर्ता गर्न सक्ने व्यवस्था मिलाइएको छ,’ उनले भने।

घटना दर्ताका लागि मोबाइल वा कम्युटरमार्फत विवरण अनलाइनमार्फत भर्न सकिनेछ। भौगोलिक हिसाबले जटिल रहेको अजिरकोटभित्रका केही वडामा वडा कार्यालयसम्म पुग्न घण्टौँ हिँड्नुपर्ने अवस्था छ। त्यसैले नागरिकको घरघरसम्म सेवा पुर्‍याउन घटना दर्ता अनलाइन माध्यमबाट गर्न थालिएको उनको भनाइ छ। बसाइँसराइ नभएका तर गाउँ छोडेर अन्यत्र बसोबास गर्दै आएका नागरिकका लागि पनि यसले घटना दर्ताका लागि सहज हुने अध्यक्ष देवकोटाले बताए।

‘अब घटना दर्ताका लागि फारम भर्न वडा कार्यालयसम्म धाउनुपर्ने बाध्यता हटेको छ,’ उनले भने, ‘अबदेखि घरमा बसेर आफ्नो मोबाइलबाट घटना दर्ताको फारम भरेर सेवा लिन पाउनेछन्। अनलाईनमार्फत घटना दर्ताका गरेपछि सेवाग्राहीले टोकन प्राप्त गर्ने र सम्बन्धित वडा कार्यालयमार्फत घटना दर्ता प्रमाणपत्र उपलब्ध गराउने व्यवस्था गरिएको छ।’

अनलाइन फारम भर्नका लागि वेबसाइट र क्युआर कोड दुवै प्रयोगमा ल्याइएको अध्यक्ष देवकोटाले बताए।