हेल्लो सरकारको २४ घन्टे सेवापछि गुनासा टिपाउनेको घुइँचो

काठमाडौं– हेल्लो सरकारको २४ घन्टे सेवा सुरुआतपछि कार्यान्वयन प्रक्रियालाई तीव्रता दिएसँगै गुनासा बढ्न थालेका छन्।

प्रधानमन्त्री पुष्पकमल दाहाल प्रचण्डले बिगु गाउँपालिका दोलखाको गुनासो सम्बोधन गरी आइतबार थालनी भएको २४ घन्टे सेवाअन्तर्गत सोमबार ओखलढुंगा मानेभन्ज्याङ गाउँपालिका–८ की देवीमाया दर्जीले शिक्षण अस्पतालमा ‘बेड’ नपाएको गुनासो गरेकी थिइन्।

गुनासोपछि तत्कालै शिक्षण अस्पतालसँग समन्वय गरी बेडको प्रबन्ध गरिएको प्रधानमन्त्री प्रचण्डको सचिवालयले जानकारी दिएको छ। सचिवालयका अनुसार उक्त सेवापछि फोनमार्फत गुनासो टिपाउने संख्या अधिक रहेको तथा आम नागरिकको चासो र विश्वास बढेको देखिएको छ।

नागरिकले ११११ मा फोन उठ्छ कि उठ्दैन भनी जाँच गर्ने गरेको, नयाँ सुरुआतका लागि शुभकामना दिन फोन गर्ने गरेको पाइएको छ। आर्थिक सहायताका लागि, विकास निर्माणका लागि, बजेट व्यवस्थापनका लागि, अनियमितता, विकास निर्माणकाकार्यमा भएको ढिलाइलगायतका विषयमा पनि नागरिकका गुनासो बढेको जानकारी गराइएको छ।

यस्तै सहकारी ठगी, अनलाइन ठगीका विषय दैनिक रूपमा बढ्दो क्रममा रहेको, सामान्य सुझाव तथा सोधपुछका विषयका सम्बन्धमा पनि गुनासा आएकाले त्यसको सम्बोधन तत्काल टेलिफोनमार्फत गरिएको प्रधानमन्त्री तथा मन्त्रिपरिषद् कार्यालयले बताएको छ।

यस्तै प्यान लिन के गर्नुपर्छ? नागरिकताको विवरण कसरी सच्चाउन मिल्छ? जस्ता जानकारी पनि माग हुने गरेको पाइएको छ। फेसबुक, ट्वीटरलगायत सामाजिक सञ्जालमा समेत गुनासोकर्ताबाट उल्लेख्य गुनासो आएको प्रधानमन्त्रीको सचिवालयले जनाएको छ।