सेनाले रोप्यो दुई हजार बिरुवा

भोजपुर–वातावरण संरक्षणका लागि नेपाली सेनाले दुई हजार ६ सय बिरुवा रोपेको छ। नेपाली सेनाको नयाँ श्रीनाथ गणले भोजपुर नगरपालिका–१२ टक्सारस्थित इनामे सामुदायिक वनमा वृक्षरोपण गरेको हो।
सेनाको ‘गो ग्रिन क्याम्पेन’ कार्यक्रमअन्तर्गत इनामे सामुदायिक वनको खालीपाखा टङटङेमा वृक्षरोपण गरिएको हो। तेजपत्ता मसलालगायत बरुवा रोपिएको सेनाले जनाएको छ।
यो अभियानअन्तर्गत जिल्लाभर बिरुवा रोप्ने योजना रहेको नयाँ श्रीनाथ गण भोजपुरका गणपति फडिन्द्र थापाले जानकारी दिए।
‘वातावरणको संरक्षणका बिरुवा रोपेका छौँ’, उनले भने, ‘हाम्रो यो अभियान जारी छ। यो अभियानअन्तर्गत जिल्लाका अन्य स्थानमा पनि बिरुवा रोप्ने लक्ष्य छ।’
सेनाले विपद्लगायत विभिन्न सामाजिक क्षेत्रमा समेत आफ्नो गतिवधि बढाएको गणपति थापाले बताए।
सेनाले थालेको बिरुवा रोपण अभियान सराहनीय रहेको उल्लेख गर्दै प्रमुख जिल्ला अधिकारी हरिप्रसाद घिमिरेले यसको संरक्षण तथा विकासमा ध्यान दिनुपर्नेमा जोड दिए।
वृक्षरोपणका लागि सेनालाई डिभिजन वन कार्यालयले बिरुवा उपलब्ध गराएको हो। डिभिजन वन कार्यालयका प्रमुख वीरेन्द्र साहले नांगा डाँडालाई हरियाली बनाउने उद्देश्यले वृक्षरोपण कार्यक्रम गरिरहेको बताए।–रासस