आजबाट सुरु हुँदै आईपीएल, गुजरात र चेन्नई आमनेसामने

काठमाडौँ- सन् २००८ बाट सुरु भएको इन्डियन प्रिमियर लिग (आईपिएल) को १६औं संस्करण शुक्रबारदेखि सुरु हुँदैछ। एक लाखभन्दा धेरै दर्शक क्षमताको नरेन्द्र मोदी रंगशालामा राति पौने ८ बजे सुरु हुने प्रतिस्पर्धामा डिफेन्डिङ च्याम्पियन गुजरात टाइटन्सले चार पटकको विजेता चेन्नई सुपर किंग्सको सामना गर्नेछ।

चार वर्षपछि आईपीएलमा उद्घाटन समारोह हुन लागेको छ। आइपीएलमा सन् २०१८ पछि ओपनिङ सेरेमोनी हुन सकेको थिएन। सन् २०१९ को प्रतियोगिता अघि पुलवामा हमलामा मृत्यु भएका सीआरपीएफका जवानलाई उद्घाटन समारोहमा खर्च हुने रकम दिइएको थियो। त्यसपछि, कोभिड-१९ महामारी फैलिएपछि प्रतियोगितालाई समेत प्रभाव पारेको थियो। यस्तोमा आईपीएल नै युएईमा आयोजना गर्नु परेको थियो।

यो वर्ष भने उद्घाटन समारोह साँझ सवा ६ बजे सुरु हुँदैछ। उद्घाटनमा नायिका तमन्ना भाटिया, रस्मिका मन्धना र अरिजितजस्ता स्टारले प्रस्तुति दिनेछन्। आयोजकले हिजो बिहीबार नै कलाकारबारे जानकारी दिएको थियो। बलिउड अभिनेत्री क्याट्रिना कैफ र नायक टाइगर स्राफले पनि प्रस्तुति दिने भारतीय मिडियामा उल्लेख छ।

प्रतियोगिता तीन वर्षपछि होम एन्ड अवे फर्म्याटमा खेल्ने आयोजकले जानकारी दिएको छ। यसरी आजको खेल गुजरातको घरेलु रंगशाला अहमदाबादमा खेलिने छ। आईपीएलमा चेन्नई सफलमध्येको टिम हो। १३ मध्ये ११ पटक प्रतियोगिताको प्ले अफमा पुगेको चेन्नईले महेन्द्र सिंह धोनीको कप्तानी चार पटक उपाधि उचालिसकेको छ। 

गुजरातसँग चेन्नईको रेकर्ड राम्रो भने छैन। पछिल्लो सिजनबाट मात्र आईपिएल खेल्न थालेको गुजरातले चेन्नईसँग दुईपटक मात्र खेले पनि दुवैमा जित निकालेको छ। त्यसैले चेन्नईलाई आज पहिलो जित निकाल्ने अवसर हुनेछ। त्यसमाथि चेन्नइसँग बेन स्टोक्स, रविन्द्र जाडेजा र महेन्द्र सिंह धोनीजस्ता उत्कृष्ट खेलाडीको साथ पनि छ। तर चोटका कारण धोनीले पहिलो खेल खेल्नेमा भने शंका छ। उनी अभ्यासको समयमा घाइते भएका थिए। तर क्लबले उनी खेल्ने बताएको छ।

यता गुजरातलाई भने उपाधि रक्षा गर्ने दबाब छ। हार्दिक पान्ड्या, राखिद खान र मोहम्मद शामीसँग मैदानमा उत्रने भएकाले आजको खेल प्रतिस्पर्धात्मक हुने आकलन गरिएको छ।