मोटरसाइकलले ठक्कर दिएको घटनाको रिसइबी साँध्दा तीनकुनेमा ४ जनाको हत्या

काठमाडौँ- काठमाडौँ-३२ तीनकुनेको दिव्य काठ मिलभित्र पसेर चार जनाको हत्या आरोपमा पक्राउ परेका व्यक्तिलाई प्रहरीले सार्वजनिक गरेको छ।

प्रहरीले सिन्धुपाल्चोक बाह्रबिसे नगरपालिका-९ का २३ वर्षीय सञ्जय भण्डारीलाई पक्राउ गरी सार्वजनिक गरेको हो।

जिल्ला प्रहरी परिसर काठमाडौंले आइतबार बेलुका भण्डारीलाई सार्वजनिक गरेको छ। प्रहरीले पत्रकार सम्मेलन गर्दै सामूहिक हत्या प्रकरण हुनुको मुख्य कारण मोटरसाइकलको ठक्कर रहेको पाइएको बताएको छ।

भण्डारी बोल्न सक्दैनन्। प्रहरीले सांकेतिक भाषाबाट उनीसँग बयान लिएको थियो।केही समयअघि मोरङ बेलबारीका नवीन भनिने विशाल राईले चलाएको मोटरसाइकलले भण्डारीलाई चाबहिलमा ठक्कर दिएको थियो।

त्यसबेला राईले भण्डारीलाई कुटपिट गरेका थिए। त्यसैको रिसिइबी साँध्न भण्डारी काठमिलमा राईलाई खोज्दै पुगेको देखिएको छ।

हत्यामा प्रयोग भएको खुकुरी।

सुरूमा राई बस्ने ठाउँ खोज्दै भण्डारी काठ मिलमा पुगेको देखिएको छ। सुरूमा उनले ‘भेट्छु निहुँ खोजे छप्काइदिन्छु’ भनी दिदी-भिनाजुको घरको डेराबाट खुकुरी लिएर काँडाघारीबाट निस्केका थिए।

मिलको पछाडिपट्टीको बन्द गेटबाट माथि चढेर उनी भित्र छिरेका थिए।

‘उनी भित्र छिरेर सोफामा बसे,’ परिसर प्रवक्ता प्रहरी उपरीक्षक कुमोध ढुंगेलले भने, ‘किन बसेको भन्दै विशालले कुटपिट गरेपछि रिस थाम्न नसकेर टाउकोमा खुकुरी प्रहार गरी हत्या गरे।’

विशालको हत्या गर्ने क्रममा बुढी आमा शुभद्रा भुजेलले देखिन्। भण्डारीले उनलाई पनि टाउकोमा खुकुरी प्रहार गरे।

त्यसपछि पूर्णबहादुर भुजेल (कुमार)ले देखे। उनलाई पनि प्रहार गरे। क्रमश: उनकी श्रीमती अम्बिकाले देखिन्। उनलाई पनि टाउकोमा नै प्रहार गरे।

काठमाडौँ प्रहरीले आयोजना गरेको पत्रकार सम्मलेन।

त्यसपछि भण्डारीले पूर्णबहादुरको लाशलाई छिसार्दै टहराको कुनामा रहेको ट्वाइलेटको ढोका छेउमा फाले। अम्बिकाको लाशलाई पानीको कल छेउमा लगेर फाले। शुभद्राको शव काठको गोदाम छेउमा लगेर फाले।

‘तत्काल उनले विशाललाई रिसिइबीको कारण हत्या गरेको भए पनि अन्य तीन जनालाई सो घटना बाहिर आउँछ भनी हत्या गरेको खुल्यो,’ ढुंगेलले भने।

चारै जनाको हतयापछि मिलको मुख्य गेटमा ड्याङड्याङ आवाज आएको र बत्तीको लाइट देखिएपछि पछाडिपट्टीको गेटबाटै हामफालेर कोटेश्वर चोक हुँदै काँडाघारी वीरेन्द्र चोकमा पुगेर दिदी-भिनाजुको कोठामा गएर सुतेको पाइएको छ।

शनिबार बिहान उठेर उनी आफू पढेको नक्सालस्थित स्कुलमा गएर साथीभाइ भेटी घर आएर सुतेको खुलेको छ।

आइतबार बिहान उठेर खान खाएपछि सिन्धुपाल्चोक घर जाने क्रममा प्रहरीले उनलाई पक्राउ गरेको हो। उनको झोलामा हत्या गर्दा प्रयोग गरेको खुकुरी बरामद भएको छ।

उनले कापीमा ‘आई किल्ड फोर पिपल’ लेखेको ढुंगेलले बताए। भण्डारीले सांकेतिक भाषामा कक्षा १२ पास गरेको बताएका छन्।

काठ मिलभित्र दोलखा घर भई सोही काठ मिलमा गेटपालेको काम गर्ने ५५ वर्षीय पूर्णबहादुर (कुमार) भुजेल, उनकी श्रीमती अम्बिका भुजेल, उनकी आमा ७० वर्षीया शुभद्रा भुजेल भुजेल र मोरङ बेलबारी घर भएका १९ वर्षीय विशाल (नवीन) राईको शुक्रबार राति हत्या भएको थियो।

हत्याको अनुसन्धान सिलसिलामा धनकुटा घर भई सोही मिलमा काम गर्ने २८ वर्षीय दीपेन्द्र राईलाई प्रहरीले पक्राउ गरेको थियो। उनी राति मिलभित्र पस्दा सबैको हत्या भइसकेको पाइएको छ।

राई राति बानेश्वर वृत्तमा हस्याङफस्याङ गर्दै ट्याक्सी लिएर पुगेका थिए। भण्डारीले हत्या स्वीकार गरेपछि प्रहरीले दीपेन्द्रलाई रिहा गरेको छ।

नवीन दीपेन्द्रका काकाका छोरा हुन्। नवीन एक महिनाअघि मात्रै वैदेशिक रोजगारीका लागि प्रक्रिया अघि बढाउन काठमाडौं आएका थिए।