उम्मेदवारी दर्ता गराउँदै लामिछानेले भने– न्यायमूर्तिबाट विवेक प्रयोग हुने आशा छ

राष्ट्रिय स्वतन्त्र पार्टीका सभापति रवि लामिछानेले चितवन–२ को प्रतिनिधि सभा सदस्यका लागि उम्मेदवारी दर्ता गराएका छन्। निर्वाचन अधिकृतको कार्यालयमा पुगेर सुरुमै उम्मेदवारी दर्ता गराएका उनले राहदानी विवादमा न्यायमूर्तिले विवेक प्रयोग गर्ने आशा व्यक्त गरेका छन्।

नागरिकता सम्बन्धी विवादका कारण सांसद पदबाट मुक्त भएपछि उपनिर्वाचनमा प्रतिस्पर्धा गर्न लागेका उनी माथि खारेज भइसकेको पुरानो नागरिकताबाट राहदानी बनाएको भन्दै उनीविरुद्ध मुद्दा परेको छ ।

गत मंसिर ४ को प्रतिनिधि सभा निर्वाचनमा रवि चितवन क्षेत्र नम्बर २ बाट निर्वाचित भएका रविको नागरिकता सम्बन्धी विवादका कारण सर्वोच्चले सांसद पद खारेज गरिदिएकाको थियो। उनले नयाँ नागरिकता लिइसकेका छन्। तर खारेज भइसकेको पुरानै नागरिकताका आधारमा राहदानी बनाएको भन्दै उनी माथि अर्को मुद्दा परेको छ।

‘९९ प्रतिशत कर्मचारीले सरकारी कार्यालयको कलम घरमा लगेर आफ्ना छोराछोरीलाई लेख्न दिनुहुन्छ । त्यो कलम सरकारी सम्पत्ति हो नि,’ उनले भने, ‘सरकारी सम्पत्तिको दुरुपयोग हो कि होइन। तर त्यसको मूल्यमा नजानुस्। त्यसरी नै मेरो त्रुटी कत्रो हो हेरौं।’ उनले फेरि पनि न्यायको कठघरामा उभिनुपर्छ भने त्यसका लागि जीवनभर तयार रहेको बताए।