विराटनगरका मेयरले खोलेको अस्पतालबाट शिशु बिक्री, डाक्टरसहित तीन जना पुगे जेल

विराटनगर- नवजात शिशु बेपत्ता तथा बिक्री गरेको कसुरमा पक्राउ डाक्टर तपेश्वरलाल कर्णसहित तीन जना पुर्पक्षको लागि कारागार चलान भएका छन्।

न्यायाधीश अम्बिकाप्रसाद दाहालको इजालासले बुधबार डाक्टर कर्णसहित कटहरी-४ का सूर्यनारयण राजवंशी र भोजपुरको हतुवागढी गाउँपालिका-४ घर भएका २७ वर्षीय गोविन्द राईलाई कारागार चलानको आदेश दिएको हो।

नवजात शिशु बेपत्ता तथा बिक्री गरेको कसुरमा मोरङ जिल्ला अदालतमा ६ जनाविरुद्ध मुद्दा दायर भएको थियो। तीमध्ये तीन जना पुर्पक्षको लागि थुनामा गएका हुन्। अन्य तीन जना धरौटीमा रिहा भएका छन्।

धरौटीमा मुक्त हुनेमा मोरङ कटहरी-२ आदर्शटोलकी ३३ वर्षीया सुधा भन्ने सुक्री राजवंशी (२ लाख), सिराहाको कल्याणपुर नगरपालिका १२ की ३८ वर्षीया नर्स निर्मला यादव (१ लाख) र ४७ वर्षीया दिलमनीदेवी राजवंशी (१० हजार) रहेका छन्।

मोरङ जिल्ला अदालतका सूचना अधिकारी होम सुवेदीका अनुसार जिल्ला सरकारी वकिलको कार्यालयले सोमबार पक्राउ परेका ६ जनाविरूद्ध अपहरण तथा व्यक्ति बेपत्ता, एकीकृत कसुर सम्बन्धी मुद्दा दायर गरेको थियो।

भोजपुर हतुवागढी-४ का २७ वर्षीय अविवाहित गोविन्द राई र उनकी प्रेमिका २६ वर्षीयाको सम्बन्धबाट गत असार १४ मा शिशु जन्मिएकी थिइन्।

विराटनगरको ग्रीनक्रस अस्पतालमा सामान्य अवस्थामा जन्मिएकी शिशुलाई डा.कर्णले मोरङको कटहरी-२ आदर्श टोलका सूर्यनारायण राजवंशी दम्पतीलाई पाँच लाख रुपैयाँमा बिक्री गरेको खुलेको थियो।

प्रहरीले उनीसहित ७ जनालाई नियन्त्रणमा लिएर अनुसन्धान गरेको थियो।

कर्णले बच्चा व्यवस्थापनका लागि अविवाहित बाबु (गोविन्द)सँग ३५ हजार रुपैयाँ लिएको पुष्टि भएको सरकारी वकिल कार्यालयले जनाएको छ। कर्णको क्लिनिक ग्रीनक्रस अस्पतालनजिक छ।

आफ्नो क्लिनिकमा आएकी गर्भवती (अविवाहित) युवतीलाई कर्णले ग्रीनक्रस अस्पतालमा लगेर सुत्केरी गराएका थिए।

त्यसक्रममा अस्पतालकी सफाइ कर्मचारी सुधा राजवंशी र क्लिनिककी सहयोगी नर्स निर्मला यादव हुँदै डा. कर्णले कटहरी-२ की दिलमाया राजवंशी र उनका छोरा सूर्यनारायणलाई उक्त शिशु पाँच लाख रुपैयाँमा बिक्री गरेको प्रहरीको अनुसन्धानले देखाएको थियो।

पक्राउ परेकामध्ये ग्रीनक्रस हस्पिटलका सञ्चालक कृष्ण खवासलाई मुद्दा नचालउने निर्णय सरकारी वकिलले गरेको छ।

ग्रीनक्रस अस्पतालका सुरुवाती सञ्चालक विराटनगरका मेयर नागेश कोइराला हुन्।

नेपाली कांग्रेसबाट मेयरमा निर्वाचित कोइरालाको घरमा ग्रीनक्रस अस्पताल सञ्चालनमा छ।

मेयर भइकन आफूले उक्त अस्पतालको स्वामित्व अरूलाई नै दिएको कोइरालाले बताउँदै आएका छन्।