इजरायलको आक्रमणमा १३ बन्धकको मृत्यु भयो : हमास

तेलअबिब- इजरायली हवाई आक्रमणमा परी १३ जना बन्धकको मृत्यु भएको हमासले बताएको छ।

हमासको सैन्य शाखा अल–कासम ब्रिगेडले कब्जामा लिइएका कम्तीमा १३ जना बन्धकको मृत्यु भएको जानकारी शुक्रबार दिएको हो।

‘पछिल्लो २४ घण्टामा उत्तरी गाजा र गाजा शहरभित्र इजरायली आक्रमणमा परी विदेशी र इजरायलीको मृत्यु भएको छ,’ विज्ञप्तिमा भनिएको छ।

उत्तरी गाजा पट्टीमा ६ जनाको मृत्यु भएको र गाजा सहरका छुट्टाछुट्टै स्थानमा ७ जनाको मृत्यु भएको विज्ञप्तिमा भनिएको छ।

इजरायली सेनाले बिहीबार राति गाजा पट्टीमा भूमिगत सुरुङ, सैन्य परिसर र साइटहरू, अधिकारीहरूका घरहरू, हतियार डिपोहरू र सञ्चार कक्षहरू सहित लगभग ७५० लक्षित आक्रमण गरेको घोषणा गरेको छ।

गाजामा सरकार चलाइरहेको गत शनिबार हमासले इजरायलमाथि आक्रमण गरेको थियो। यसपछि इजरायलले पनि हमासमाथि भन्दै गाजा सहरमा हवाइ आक्रमण गरिरहेको छ।

हमास आक्रमणमा परी १३ सय जनाको मृत्यु भएको इजरायलको भनाइ छ। इजरायलले गाजामा गरेको हवाइ आक्रमणबाट २ हजार व्यक्तिको मृत्यु भएको प्यालेस्टाइनले बताएको बीबीसीले जानकारी दिएको छ।

इजरायलले उत्तरी गाजापट्टीका ११ लाख बासिन्दालाई क्षेत्र खाली गर्न चेतावनी दिएको छ। यसपछि मानिसहरू पैदलै घर छोडेर हिँड्न थालेका छन्।

संयुक्त राष्ट्रसंघले एकैपटक ठूलो संख्यामा मानिसहरू खाली गर्नु संकटपूर्ण भएको भन्दै मानवीय सहायतका लागि आग्रह गरेको छ।