टोखा चण्डेश्वरी अस्पताललाई सीएलआईए कल्चर मेसिन हस्तान्तरण

काठमाडौँ- काठमाडौँ निर्वाचन क्षेत्र नं. ५ स्थित बागमती प्रदेशअन्तर्गतको टोखा चण्डेश्वरी अस्पताललाई सीएलआईए कल्चर मेसिन हस्तान्तरण गरिएको छ। सोमबार एक कार्यक्रमबीच मेसिन हस्तान्तरण गरिएको हो।

चुनावताका संघीय सांसद प्रदीप पौडेलले टोखाका स्थानीयबासीलाई सुविधासम्पन्न क्यान्सर स्कि्रनिङ ल्याब स्थापना गर्ने प्रतिबद्धता जनाएका थिए। क्यान्सर जाँच मेसिनको माग गरेको र त्यो पनि चाँडै पूरा हुने मेसिन हस्तान्तरण गर्दै सांसद पौडेलले कार्यक्रममा जानकारी दिए।

पौडेलकै पहलमा लाइन्स क्लबले अस्पताललाई कल्चर मेसिन उपलब्ध गराएको हो। पौडेलले लाइन्स क्लबका प्रतिनिधिहरूले पुर्‍याएको सहयोगको लागि पनि उनले धन्यवाद व्यक्त गरेका थिए।

‘क्षेत्र नम्बर ५ का कुनै पनि बिरामीले उपचारको लागि अन्यत्रका अस्पताल जान नपर्ने गरी सेवा सुविधा दिन लागिरहेका छौँ। यस अस्पतालमा ती सेवा सुविधाहरू चाँडै नै उपलब्ध हुने विश्वास छ,’ पौडेलले बताए।

त्यसैगरी, परीक्षण गर्न योग्य ल्याब स्थापनाको लागि सहयोग पुर्‍याउने प्रयोगशाला (बागमती प्रदेश)लाई धन्यवाद व्यक्त गरे। अस्पतालमा पाठेघरको क्यान्सर, स्तन क्यान्सर, छालालगायतका अंगको क्यान्सरको उपचारका विषयमा पनि आफूहरूले ध्यान दिइरहेको पौडेलको भनाइ थियो।

कार्यक्रममा प्रदेश स्वास्थ्य मन्त्री माननीय उत्तम जोशीले सांसद पौडेलकै जोडबलका कारण टोखा अस्पतालमा कल्चर मेसिन भित्रिएको बताए।

कार्यक्रमको आयोजना बागमती प्रदेश सरकार स्वास्थ्य मन्त्रालय तथा स्वास्थ्य प्रयोगशाला धुलिखेलले संयुक्त रुपमा गरेका थिए भने कार्यक्रममा स्थानीय व्यक्तित्वहरू, प्रहरी, नेपाली कांग्रेस पार्टीका वडा नं २ र ३ का सभापतिहरू, स्वयंसेविकाहरु, चिकित्सकहरू, नर्स तथा लायन्स क्लबका प्रतिनिधिहरूको उपस्थिति रहेको थियो।