विराटनगर आगलागीमा मृत्यु हुनेको संख्या दुई पुग्यो

मोरङ- विराटनगर–७ स्थित सातघुम्तीमा रहेको कबाडी गोदाममा भएको आगलागीमा परी मृत्यु हुनेको संख्या दुई पुगेको छ।

बुधबार दिउँसो २ः१५ बजे आगलागी हुँदा गम्भीर घाइते भएका दुई जनाको मृत्यु भएको हो। घटनमा परी चार जना घाइते भएका छन्।

जिल्ला प्रहरी कार्यालय मोरङका प्रवक्ता प्रहरी नायब उपरीक्षक रञ्जनकुमार दाहालका अनुसार मृत्यु हुनेमा कबाडी धनी विराटनगर–६ निवासी ४० वर्षीय दीपक मण्डलको उपचारका क्रममा मृत्यु भएको हो। यसअघि नै जलेको अवस्थामा भेटिएको अर्को शवको भने पहिचान खुलेको  छैन।

विराटनगर–६ की ६५ वर्षीया सुशीला पासवान र सोही स्थान बस्ने ६० वर्षीया रिता सरदार गम्भीर घाइते भएका छिन्। विराटनगर–६ का ५८ वर्षीय किशोर पासवान र कटहरी गाउँपालिका ३० वर्षीया पिङ्की कामत सामान्य घाइते भएका छन्। घाइतेहरुको न्यूरो अस्पताल र कोशी अस्पताल विराटनगरमा उपचार भइरहेको छ।

आगलागी ६ वटा बारुणयन्त्र, नेपाली सेना, सशस्त्र प्रहरी, नेपाल प्रहरी र स्थानीय जनसमुदायको सहयोगमा आगलागी नियन्त्रणमा लिएको प्रहरी नायब उपरीक्षक दाहालले बताए।

आगलागीका कारण एवं क्षति विवरण थाहा हुन नसकेको प्रहरीले जनाएको छ।