विश्वको पहिलो एआई कानूनमा शुक्रबार पुनः छलफल गर्दै इयु

काठमाडौँ- युरोपेली युनियन (इयु)ले कृतिम बौद्धिकता (एआई) सम्बन्धी विश्वको पहिलो कानूनमा शुक्रबार पनि छलफल गर्ने भएको छ। करिब २४ घन्टाको छलफलपछि बिहीबार इयुले एआई सम्बन्धी कानूनमा व्यापक सम्झौता गर्न असफल भए अर्को छलफल शुक्रबारका लागि बोलाइएको हो।

गत वर्ष च्याटजिपिटी बटले एआईको तीव्र प्रगति गर्दै विश्वलाई नै चकित बनाएदेखि यो मुद्दाले थप आवश्यकता बोध गराएपछि ब्रसेल्स सन् २०२३ को अन्त्यभन्दा अघि नै विश्वको पहिलो व्यापक एआई कानूनलाई अनुमोदन गर्न चाहन्छ। च्याटजिपिटीले सरल प्रयोगकर्ता सङ्केतहरूबाट केही सेकेन्ड भित्रै भावपूर्ण निबन्ध र कविताहरू तयार गर्ने क्षमताबाट धेरैलाई आश्चर्यचकित बनाएको छ।

श्रम र स्वास्थ्य सेवालाई रूपान्तरण गर्न यो प्रविधिको क्षमता भए पनि आलोचकहरूले डिपफेक तस्बिरसहित एआईबाट गलत सूचना र दुरुपयोगको बढ्दो जोखिमलाई औँल्याएका छन्। बिहीबार बिहानै एउटा सम्झौतालाई अन्तिम रूप दिने महत्त्वाकांक्षी अपेक्षाका साथ युरोपेली संसद् र इयुका सदस्य मुलुकका वार्ताकारहरूले बुधबार दिउँसो छलफल सुरु गरेका हुन्।

‘एआई ऐनमा पछिल्लो २२ घन्टामा धेरै प्रगति भएको छ, भोलि बिहान नौ बजे (०८ः०० जिएमटी) इयु संसद् र काउन्सिलसँग पुनः छलफल सुरु हुँदैछ’, इयुयका आन्तरिक बजार आयुक्त थिएरी ब्रेटनले सामाजिक सञ्जालमा भनेका छन्।

कुनै वास्तविक सीमा नभए पनि इयुका वरिष्ठ अधिकारीहरूले बिहीबार बिहानसम्म कानूनी पाठलाई अन्तिम रूप दिन धेरै राजनीतिक पूँजी लगाएका छन्। शुक्रबार कुनै सम्झौतालाई अन्तिम रूप दिए पनि कानून चाँडोमा सन् २०२६ सम्म लागू हुनेछैन।

Lots of progress made over past 22 hours on the #AIAct

Resuming work with EU Parliament and Council tomorrow at 9:00 AM

Stay tuned!#Trilogue pic.twitter.com/gEnggaRKTR

— Thierry Breton (@ThierryBreton) December 7, 2023