दाजुभाइको विवाद मिलाइदिन्छु भन्दै २ लाख घुस, पोखरा न्यायिक समिति सदस्यले दिइन् राजीनामा

पोखरा- पोखरा महानगरपालिका अन्तर्गतको न्यायिक समितिकी सदस्य भावना श्रेष्ठले राजीनामा दिएकी छिन्। रु दुई लाख घुस लिएको आरोप लागेपछि उनले राजीनामा दिएकी हुन्।

पोखरा-२६ को विजयपुरस्थित जग्गा विवाद मिलाइदिने भन्दै श्रेष्ठले २ लाख लिएको आरोप लागेको छ। रुपा गाउँपालिकामा कार्यरत कर्मचारी रविनकुमार श्रेष्ठले दिएको उजुरी पोखरा न्यायिक समितिमा पुगेको थियो।

सोही विवाद मिलाइदिने भन्दै समिति सदस्य भावनाले २ लाखको चेक लिएको आरोप लागेको हो। श्रेष्ठले उपमेयर मन्जुदेवी गुरुङलाई समेत रकम दिनुपर्ने बताएकी थिइन्। गुरुङले उक्त आरोपको खण्डन गरेकी छिन्।

दुई लाख रुपैयाँ लिएको आरोपमा विवादित भएपछि पोखरा-९ की वडा सदस्यसमेत रहेकी श्रेष्ठले न्यायिक समितिबाट राजीनामा दिएकी छिन्। श्रेष्ठले शनिबार नै म्यासेन्सजरमा राजीनामा पठाएको उपमेयर तथा न्यायिक समितिकी गुरुङले बताइन्।

‘राजीनामा पत्र आएको छ,’ गुरुङले नेपाल क्लिक्ससँग भनिन्, ‘म त्यहाँ बस्न नसक्ने भएकाले राजीनामा दिएको भन्नु भएको छ। विस्तृत कारण खुलाउनु भएको छैन।’

न्यायिक समितिको पहिलो कार्यकालबाट नै रविनकुमारको जग्गाको विवाद समितिमा आएको थियो। अंश पाएको जग्गामा रविनकुमारका दाजुभाइबीच विवाद थियो।

अंशमा बाटोतर्फको जग्गा रविनका भाइलाई परेकोले आफूले पनि जग्गामा पुग्नका लागि बाटो खुलाइपाउँ भन्दै रविनले समितिमा उजुरी दिएका थिए।

यसपछि समिति सदस्य भावनाले भने दुई मिटर बाटो कायम गराइदिने तर त्यसका लागि आफूलाई २ लाख चाहिने भन्दै उक्त रकम घुस लिइन्। तर न्यायिक समितिले भने उनले दिएको शर्तअनुसार बाटो कायम गर्ने निर्णय गरिदिएन। बरु कृषि कर्मका लागि भनेर ३ फिटको बाटो उपलब्ध गराउने निर्णय गरिदियो। समितिको यो निर्णयमा रविनले चित्त बुझाएनन्।

आफूले भनेअसनुसारको बाटो कायम गराउने निर्णय समितिबाट नभएकाले आफूले दिएको दुई लाख रकम उनले फिर्ता माग गरेका थिए। यो विषयमा गण्डकी छड्केले शुक्रबार राति प्रसारण गरेपछि भावनाले शनिबार समितिकी संयोजक मञ्जुको म्यासेन्जरमा राजीनामा पठाएकी हुन्।

भावनाको राजीनामा आएपछि उपप्रमुख मञ्जुले न्यायिक समितिको बैठक राखेकी थिइन्। भावनाको राजीनामालाई कार्यपालिकामा पेस गर्ने र छानबिन गर्न सिफारिस गर्ने निर्णय समितिले गरेको उपप्रमुख मञ्जुले जानकारी दिइन्।