गणेशमान सिंह बक्सिङमा बागमती र एपीएफ च्याम्पियन

काठमाडौँ- बागमती प्रदेश र नेपाल एपीएफ क्लब वीर गणेशमान सिंह राष्ट्रिय बक्सिङ प्रतियोगितामा च्याम्पियन बनेका छन्। बागमती पुरुष तथा एपीएफ महिलामा च्याम्पियन बनेका हुन्।

लैनचौरस्थित राष्ट्रिय टेबलटेनिस प्रशिक्षण केन्द्रको हलमा भएको प्रतियोगितामा बागमती १ स्वर्ण, ३ रजत र २ कास्यसहित टिम च्याम्पियन बनेको हो। ६ स्पर्धा समावेश पुरुषतर्फ एपीएफ, कोशी प्रदेश, सुदूरपश्चिम प्रदेश, नेपाल प्रहरी र लुम्बिनीले पनि समान १–१ स्वर्ण जिते। बागमती रजतका आधारमा पहिलो भएको हो। एपीएफले स्वर्णबाहेक २ रजत र १ कास्य जितेको थियो।

महिलामा पनि ६ स्पर्धामै भएको भिडन्तमा एपीएफले ३ स्वर्ण, १ रजत र १ कास्य जितेर च्याम्पियन बनेको हो। बागमतीले २ स्वर्ण तथा प्रहरीले १ स्वर्ण हात पारेको छ।

वीर गणेशमान सिंह फाउन्डेसनअन्तर्गतको खेलकुद समितिले आयोजना गरेको प्रतियोगिताको पुरुषमा रविन थापा उत्कृष्ट खेलाडी घोषित भए। महिलामा आइबा विश्व बक्सिङ च्याम्पियनसिपमा दुई ‘बाउट’ जितेर नेपाली बक्सिङमा इतिहास रचेकी अन्जनी तेली उत्कृष्ट खेलाडी चुनिइन्। उत्कृष्टले समान २५–२५ हजार नगद पुरस्कार पाए। रविन र अन्जनी आ–आफ्नो स्पर्धाका स्वर्ण विजेता हुन्।

प्रतियोगिताको अन्तिम दिन १२ वटै स्वर्णको छिनोफानो भएकोमा पुरुष ५१ केजी तौलसमूह फाइनलमा रविन थापाले फाइनलमा एपीएफका आश तामाङलाई पराजित गरेका थिए। ५७ केजी समूहमा कोशीका सुरेन्द्र राई पहिलो भए। उनले फाइनलमा बागमतीका शुलभ मालीलाई हराए।

६३.५ केजीमा साग स्वर्णधारी प्रहरीका भूपेन्द्र थापा पहिलो भए। उनले फाइनलमा एपीएफका सोनाम सार्कीलाई पाखा लगाए। ७१ केजी फाइनलमा सुदूरपश्चिमका भरत चन्दले कोशीका प्रशान्त दाहालमाथि जित रच्दै शीर्ष स्थानमा रहे। ८० केजीमा लुम्बिनीका हेमराज रावलले बाजी मारे। उनले फाइनलमा बागमतीका मनोज तामाङको चुनौती पन्छाए। ९२ केजी फाइनलमा एपीएफका रविन नेपालले बागमतीका उमङ महर्जनलाई हराउदै स्वर्ण चुमे।

महिला ५० केजीमा एएसबीसी यु–२२ बक्सिङ च्याम्पियनसिपमा रजत जित्दै इतिहास कायम गरेकी बागमतीकी सुष्मा तामाङ पहिलो भइन्। सुष्माले फाइनलमा मधेश प्रदेशकी अस्मिता दुवाललाई पराजित गरिन्। ५४ केजीमा बागमतीकी एन्जनी तेलीले फाइनलमा एपीएफकी सन्जुमाया थिङलाई पराजित गर्दै पहिलो बनिन्। ५७ केजीमा प्रहरीकी निशा तामाङले स्वर्ण जित्न बागमतीकी पेमा शेर्पालाई पाखा लगाइन्। ६० केजीमा एपीएफकी संगिता सुनुवारले पहिलो स्थान कब्जा गरिन्। संगिताले फाइनलमा बागमतीकी हेमा राईलाई पाखा लगाइन्।

महिला ६६ केजीमा एपीएफकी विनिता थापा मगर तथा ७५ केजीमा एपीएफकी सरस्वती राना मगरले पहिलो स्थान हात पारे। विनिताले बागमतीकी निश्मा गुरुङ तथा सरस्वतीले कोशीकी त्रिशा जबेगुलाई फाइनलमा पन्छाए। प्रत्येक स्पर्धामा शीर्ष तीन स्थान हात पार्ने खेलाडीले क्रमशः २५ हजार, १५ हजार र ७ हजार ५ सय हजार नगद पुरस्कार प्राप्त गरे।