गेटामा बस्न नपाएपछि मन्दिर पुगे डा केसी, धर्मशालाबाट अनशन सुरु

धनगढी- चिकित्सा शिक्षा सुधारका अभियान्ता प्राडा गोविन्द केसीले अनशन सुरु गरेका छन्। डा केसीले धनगढीको लक्ष्मीनारायण मन्दिरको धर्मशालाबाट अनसन सुरु गरेका हुन्।

अनशन बस्नका लागि डा केसी गेटा अस्पताल पुगेका थिए। तर त्यहाँ अनसन बस्न नदिएपछि डा केसीले धर्मशालाबाट अनशन सुरु गरेका हुन्। केसी निकट डा अमृत जोशीका अनुसार गेटा मेडिकल कलेजमा सत्याग्रहमा बस्न नमिलेपछि मन्दिरको धर्मशालाबाट अनशन शुरु भएको हो।

गेटामा सहिद दशरथ चन्द राष्ट्रिय स्वास्थ्य विज्ञान विश्वविद्यालय स्थापनार्थ संघर्ष समितिले प्रतिष्ठानको विषयलाई मागको विषय नबनाउन भन्दै हुलहुज्जत गरेको थियो।

समितिका संयोजक लोकराज पाण्डेले सहिद दशरथ चन्द राष्ट्रिय स्वास्थ्य विज्ञान विश्वविद्यालय सञ्चालन गर्ने नीतिगत निर्णय भइसकेको अवस्थामा प्रतिष्ठानको विषयलाई लिएर अनशन बस्नु उचित नहुने बताएका थिए।

डाक्टर केसीले गेटामा शीघ्र स्वास्थ्य विज्ञान प्रतिष्ठान सञ्चालनमा ल्याउनुपर्ने माग गरेका छन्।

डा केसीले संक्रमणकालीन न्यायसम्बन्धी विषय तत्कालै टुंगो लगाउनु पर्ने र विगतमा भएका सम्झौता कार्यान्वयन गर्नुपर्ने माग राखेका छन्। डा केसीसँग सरकारले सरकारी अस्पतालहरुमा मागअनुसार दरबन्दी थप गर्दै क्षमता बढाउने र सबै निःशुल्क औषधिहरु पाइने सुनिश्चित गर्ने सम्झौता गरिसकेको छ।

यस्तै, १०० शय्या भन्दा बढी क्षमता भएका सरकारी अस्पतालहरूमा नर्सिङलगायत अन्य स्वास्थ्यसम्वन्धी विषयका कार्यक्रम सुरु गर्नुपर्ने, विश्वविद्यालय र प्रतिष्ठानहरुमा पदाधिकारी नियुक्तिको मापदण्डसहित कानुनी व्यवस्था गर्ने पनि समझदारी गरेको थियो।