‘मेस्सी र रोनाल्डोको स्तरमा छन् हाल्यान्ड’

काठमाडौं – पछिल्लो खेलमा म्यानचेस्टर सिटीले लिभरपुललाई ४–१ ले हराउँदा युवा फरवार्ड इर्लिङ हाल्यान्ड चोटका कारण टिमबाहिर थिए। तर शनिबार राति कमब्याक गरेका उनको सानदार प्रदर्शनमा सिटीले साउथह्यामटनविरुद्ध उसकै मैदानमा उतिनै फराकिलो जित निकालेको छ।

खासगरि हाल्यान्डको बाइसाइकल किकले गएराति साउथह्याम्टनका घरेलु समर्थकलाई स्तब्ध बनाएको थियो भने सिटीका समर्थकलाई रोमाञ्चक। ‘हामीले दुई दशकसम्म क्रिस्टियानो रोनाल्डो र लियोनल मेस्सीको खेल हेरेर वितायौँ। हाल्यान्ड ति खेलाडीको स्तरका खेलाडी हुन्,’ हाल्यान्डबारे प्रशिक्षक पेप ग्वार्डिओलाले भनेका छन्, ‘खासगरी त्यो दोस्रो गोल धेरै अचम्मको रह्यो। आकासमा बल नियन्त्रणमा लिएर त्यसलाई घाँससम्म पुर्याउनु कठिन काम हो।’

साउथह्याम्टनको सेन्ट म्यारी रंगशालामा भएको खेलमा सिटीका लागि हाल्यान्डले दुई गोल गरेका थिए। उनले पहिलो हाफको अन्तिम मिनेटमा केभिन डिब्रुएनाबाट पाएको क्रसलाई हेडरमार्फत् गोल गरेर सिटीलाई अग्रता दिलाए।

हाल्यान्डकै पासमा ज्याक ग्रिलिसले ५८ औं मिनेटमा अग्रता दोब्बर बनाए भने हाल्यान्डले नै ६८ औं मिनेटमा स्कोरलाई ३–० मा पुर्याएका थिए। ग्रिलिसले बायाँबाट दिएको बललाई उनले सुन्दर ढंडबाट गोल गरेका थिए। ‘एक्रोब्याटिक’ प्रहार गरेका उनले आफ्नो चर्चित योगा अभ्यास गरेर गोल सेलिब्रेसन गरेका थिए।

‘मलाई लाग्छ हाम्रो क्लबले उनलाई यस्तै खेलका लागि किनेको थियो। हामीले आज आफ्नो उत्कृष्ट खेलेका थिएनौँ तर उनी उच्च फर्ममा थिए,’ ग्वार्डिओलाले खेलपछि भने। हाल्यान्डले अहिलेसम्म प्रिमियर लिगमा ३० गोल पुरा गरेका छन् भने सिजनभरी ४४ गोल गरिसकेका छन्। प्रिमियर लिगका कुनै पनि खेलाडीले भन्दा छिटो – २७ खेलमा ३० गोल – हाल्यान्डले गरेका छन्।

पहिलो सिजनमै ३० गोल पुर्याउने तेस्रो खेलाडी हुन हाल्यान्ड।

‘उनले धेरै गोल गरिरहेका छन्। यदी हामीले अवसर बनाइरहने हो भने उनी गोलका लागि जहिल्यै त्यहाँ हुनेछन्,’ खेलपछि केभिन डिब्रुएनाले भनेका छन्। के डिब्रुएनाले चाहिँ एक्रोब्याटिक प्रहार गर्न सकलान् त ? उनले जवाफमा व्यंग्य गरेका छन्, ‘मैले त्यसरी गोल गरेको देख्न पाउनु हुनेछैन। यदी त्यस्तो भएको भए तपाईंले मलाई साउथह्याम्टनको अस्पतालमा भेट्नुहुने थियो।’

गएराति, सेकोउ माराले ७२ मिनेटमा गोल फर्काएसँगै खेलको नतिजा ३–१ भएको थियो। साउथह्याम्टनले गोल गरेको तीन मिनेटमै सिटीलाई पेनाल्टीको अवसर प्रदान गर्न पुग्यो। पेनाल्टीको अवसरमा जुलियन अल्वारेजले गोल गरेर नतिजा फराकिलो बनाएका थिए।

गएरातिको खेलसँगै प्रिमियर लिगको दोस्रो स्थानमा रहेको सिटीले २९ खेलमा ७५ गोल गरेको छ। यो सिजन सबैभन्दा धेरै गोल गर्ने टिम सिटी नै हो। शीर्षस्थानको आर्सनलले पनि ७० गोल गरेको छ।

गएरातिको जितसँगै ६७ अंक बनाएको सिटी आर्सनलभन्दा पाँच अंकले पछि छ। साउथह्याम्टन भने २३ अंकका साथ लिगको पुछारमा छ।

प्रिमियर लिगमा गएरातिकै खलमा बर्नेमाउथले जित निकालेको छ भने टोटेनहमले ब्राइटोनलाई २–१ ले हराएको छ।