नबिकेका गाडी फिर्ता पठाउने विषयमा अर्थमन्त्री र नाडाबीच छलफल

काठमाडौँ- नाडाका अध्यक्ष डा. ध्रुव थापाको नेतृत्वमा गएको एक प्रतिनिधि मण्डलले बिहीबार अर्थ मन्त्री प्रकाशशरण महतसँग अटोमोबाइल क्षेत्रका विभिन्न विषयहरुमा छलफल गरेको छ।

उक्त छलफलमा अध्यक्ष थापाले हालै वीरगञ्ज तथा भैरहवा भन्सार परिसरमा जम्मा भएका सामानहरु भन्सार बिन्दुबाट छृटाउने सम्बन्धमा विभिन्न जानकारी प्रदान गरे। उनले अन्य सामान जस्तै सवारी साधन नहुने र आयु लामो हुने भएकाले त्यसै अनुसार व्यवहार गर्न आग्रह गरे।

उनले व्यवसायीले क्रमशः सवारी साधन छुटाइरहेको जानकारी दिदै हालैको ६ महिनाभित्रै पनि करीब १६०० सवारी तथा ढुवानीका साधनहरु भन्सार जाँचपास गराइ सकिएको जानकारी दिए।

व्यवसायीहरुले पार्किङबापत करोडौं रकम तिरी नै रहेको, उत्पादक कम्पनी र आधिकारिक विक्रेताको सम्झौता बमोजिम सवारी साधनहरु उत्पादन गर्न कयौं महिनापूर्व आदेश दिनु पर्ने, कबुल गरेको सँख्यामा सवारी साधनहरु लिनैपर्ने अवस्था रहेकाले नेपालमा खपत हुन नसकेका सवारी साधन फिर्ता गर्न सकिने व्यवस्था गर्न माग गरेका थिए। कम्तीमा चालु आर्थिक वर्षको अन्त्यसम्मको लागि भन्सारमा आइसकेका सवारी तथा ढुवानीका साधनहरुको हकमा भन्सार विन्दुबाट सामान छुटाउन मिल्ने गरी समयावधि थपका लागि आग्रह समेत गरेका थिए।

छलफलमा नाडाका उपाध्यक्ष राजनबाबु श्रेष्ठले बिक्री हुन नसकी भन्सार बिन्दुहरुमा रहेका ती सवारी तथा ढुवानीका साधनहरुलाई कुनै पनि मुलुकमा रिएक्सपोर्ट गर्न सकिने व्यवस्थाको परिकल्पना आर्थिक ऐनले पनि गरेकाले त्यसको कार्यान्वयन गर्न माग गरे।

त्यसैगरी सो छलफलमा नाडाका महासचिव सुरेन्द्रकुमार उप्रेतीले नेपालमै उत्पादन हुने सबै किसिमका ब्याट्रीहरु निर्यात गर्दा अन्य निर्यात वस्तुहरुले पाउने सरहको छुट पाउने व्यवस्थाका लागि अनुरोध गर्दे नेपालमा उत्पादित व्याट्रीहरुलाई पनि नेपालको गुणस्तर प्रमाण चिन्ह पाउने व्यवस्थाका लागि समेत आग्रह गरे।

त्यस्तै नाडाका सचिव विक्रम सिंघानियाले पनि नेपालमा उत्पादित टायर निर्यात गर्दा पनि सोही किसिमको व्यवस्थाका लागि अनुरोध गरे।