प्रहरीको गोलीबाट मृत्यु भएका युवाका परिवार र प्रशासनबीच ११ बुँदे सहमति

सर्लाही-  सर्लाहीको बरहथवामा प्रहरीको गोली लागी मृत्यु भएका युवकका परिवार र प्रशासनबीच ११ बुँदे सहमति भएको छ।

सहमतिपछि प्रहरीको गोली लागेर शुक्रबार दिउँसो मृत्यु भएका बरहथवा नगरपालिका-६ का जयशंकर साहको शव घटनास्थलबाट उठाउने तयारी भएको छ।

अस्पताल स्तरोन्नति गर्नुपर्ने विषयमा भएको आन्दोलन फिर्ता लिन आइतबार ११ बुँदे सहमति भएको सर्लाहीका प्रमुख जिल्ला अधिकारी कोमलप्रसाद धमलाले जानकारी दिए।

सहमतिअनुसार बरहथवास्थित प्राथमिक स्वास्थ्य केन्द्र मधेश सरकारलाई हस्तान्तरण गरी ५० शय्याको बनाउने, त्यस अस्पतालको नाम प्रहरीको गोली लागेर मृत्यु भएका जयशंकर साहको नामबाट नामकरण गर्ने, मृतक परिवारलाई रोजगारी दिनेलगायतका विषय सहमतिमा उल्लेख छन्।

यस्तै सहिद घोषणाका लागि केन्द्रमा सिफारिस गर्ने गरी सहमति भएको छ। मृतक साहको सालिक बनाउने विषय पनि सहमतिमा छ।

अस्पतालको स्तरोन्नती गर्ने विषयमा भएको आन्दोलनको क्रममा प्रहरीको गोली लागेर बरहथवा नगरपालिका–६ मा व्यवसाय गर्दै आएका जयशंकरको घटनास्थलमै मृत्यु भएको थियो।