केक भित्र गाँजा राखेर बिक्री गर्ने युवक पक्राउ

काठमाडौँ- नेपाल प्रहरीले केक भित्र गाँजा राखेर बिक्री वितरण गरेको आरोपमा १ युवकलाई पक्राउ गरेको छ।

प्रहरीको लागू औषध नियन्त्रण ब्युरोले केकमा लागू औषध गाँजा मिसाइ अनलाइनमार्फत कारोबार गरेको आरोपमा काठमाडौँ महानगरपालिका वडा नं २९ घट्टेकुलो बस्ने २६ वर्षीय विशन मानन्धरलाई पक्राउ गरेको हो।

ब्युरोका प्रवक्ता, प्रहरी उपरीक्षक चक्रराज जोशीले केक भित्र गाँजा राखेर अनलाइनमार्फत कारोबार गरेको आरोपमा मानन्धरलाई पक्राउ गरिएको जानकारी दिए। ‘इन्स्टाग्राममा अकाउन्ट बनाएर त्यसमार्फत मानन्धरले ती केक बिक्री वितरण गर्ने गरेको अनुसन्धानमा खुलेको छ,’ उनले भने।

प्रहरीले पक्राउ मानन्धरसँग गाँजाको धुलो १२१ ग्राम, तयारी अवस्थाको केकको झोला १७८ ग्राम, गाँजा तीन किलोग्राम बरामद गरेको छ। मानन्धरले विगत एक वर्षदेखि यसरी केक बनाएर बेच्ने गरेको प्रारम्भिक अनुसन्धानबाट खुलेको ब्युरोले जनाएको छ।

पक्राउ मानन्धरलाई लागू औषध नियन्त्रण ऐन, २०३३ बमोजिम आवश्यक अनुसन्धान भइरहेको ब्युरोका प्रवक्ता जोशीले बताए।