अफगानिस्तानलाई पराजित गर्दै विश्वकपको ‘सुपर सिक्स’मा पुग्यो नेपाल

काठमाडौँ- नेपाली यू–१९ क्रिकेट टोली आइसीसी यू–१९ विश्वकपको सुपर सिक्समा प्रवेश गरेको छ।

शुक्रबार भएको खेलमा नेपालले अफगानिस्तानलाई १ विकेटले हराउँदै सुपर सिक्समा प्रवेश गरेको हो।

इस्ट लन्डनमा अफगानिस्तानले दिएको १४६ रनको लक्ष्य पछ्याएको नेपालले ४४ ओभर ४ बलमा ९ विकेट गुमाउँदै पूरा गर्‍यो।

नेपालका लागि कप्तान देव खनालले ५८ रनको अर्धशतकीय पारी खेले। ८९ बल खेलेका उनले ७ चौका प्रहार गरे।

दीपक बोहराले २७, आकाश त्रिपाठी १६ रनको योगदान गरे। खेलमा बाँकी ब्याटरले दोहोरो अंकमा रन जोड्न सकेनन्।

आफगानिस्तानका लागि फ्रिदोन दावदजाईले तीन विकेट लिए। त्यस्तै खलिल अहमद र नसिर खानले दुई–दुई विकेट लिए। अफगानिस्तानका लागि गजनफर र अर्ब गुलले एक–एक विकेट लिए।

त्यसअघि टस जितेर पहिले ब्याटिङ गरेको अफगानिस्तानले ४० ओभर १ बलमा सम्पूर्ण विकेट गुमाउँदै १४५ बनाएको थियो।

आफगानिस्तानका लागि गाजनफरले सर्वाधिक ३७ रन बनाए। त्यस्तै नसिर खानले ३१ रन जोड्दा फ्रिदोनले २९ रनको योगदान गरे।

नेपालका लागि आकाश चन्दले सर्वाधिक विकेट लिए। उनले ८ ओभर बलिङ गर्दै ३४ रन खर्चेर ५ विकेट लिए। त्यस्तै दिपेश कँडेलले दुई विकेट लिँदा गुलशन झा, सुवास भण्डारी र तिलक बर्माले एक–एक विकेट लिए।

यो जितसँगै नेपाल विश्वकपको सुपर सिक्समा प्रवेश गरेको हो।