कांग्रेसको भागमा ९ मन्त्रालय, शेखर समूहलाई ३ मन्त्री र एक राज्यमन्त्री

काठमाडौँ- सत्तासाझेदार दल नेपाली कांग्रेसले ९ मन्त्री र एक राज्यमन्त्री पाउने भएको छ। यसअघि सत्ता गठबन्धनमा कांग्रेसले ८ मन्त्रालय पाउने सहमति भएको थियो। तर, कांग्रेसभित्र आन्तरिक किचलो बढ्दा मन्त्रिपरिषद्ले पूर्णता पाउन सकेको थिएन। चैत १७ गते भएको मन्त्रिपरिषद् विस्तारमा कांग्रेसले ४ जनालाई मन्त्री बनाएको थियो।

सभापति शेरबहादुर देउवाले आफू पक्षका ४ जनालाई मन्त्री बनाउँदा नेता शेखर कोइराला र महामन्त्री गगन थापा समूहले मन्त्रीको नाम दिएको थिएन। शेखर–गगन समूहले तीन मन्त्रालय मागेको थियो। तर, थप एक मन्त्रालय आफूले लिएर संस्थापन इतर समूहलाई मिलाउने प्रयास देउवाले गरेका हुन्।

चैत १७ गते जनमत पार्टीबाट खानेपानीमन्त्री बनेका अब्दुल खानले राजीनामा दिएका थिए। खानले राजीनामा दिएपछि थप एक मन्त्रालय खाली बनेको थियो। त्यो मन्त्रालयले कांग्रेसले लिने भएको छ।

देउवाले शेखर–गगन समूहलाई ३ मन्त्री र एक राज्यमन्त्री छान्न आग्रह गरेका छन्। बिहीबार बिहान बालुवाटारस्थित नेता कोइरालाको सचिवालयमा संस्थापनइतर समूहको बैठक बसेको थियो। बैठकले तीन जना मन्त्री र एकजना राज्यमन्त्री छानेर देउवालाई बुझाउने निर्णय गरेको छ।

अब देउवा पक्षबाट अझै २ मन्त्री बन्नेछन्। स्रोतका अनुसार देउवाले एनपी साउद र मोहनबहादुर बस्नेतलाई मन्त्री बनाउने तयारी गरेका छन्।
संस्थापनइतर समूहबाट उपसभापति धनराज गुरूङ, सहमहामन्त्रीद्वय बद्री पाण्डे र जीवन परियार, सांसद डिगबहादुर लिम्बु, सुरेन्द्र आचार्य लगायतका सांसद् मन्त्रीका लागि आकांक्षी छन्।

यसअघि कांग्रेसबाट उपसभापति पूर्णबहादुर खड्का उपप्रधान तथा रक्षामन्त्री, प्रकाशशरण महत अर्थमन्त्री, नेताहरू रमेश रिजाल उद्योगमन्त्री र सीता गुरूङ सहरी विकासमन्त्री बनेका थिए।