फैसला कार्यान्वयन अन्तर्गत ५ हजार बढी पक्राउ, १ अर्ब बढी जरिवाना असुल

काठमाडौँ- चालु आर्थिक वर्षको पहिलो ६ महिनामा नेपाल प्रहरीले फैसला कार्यान्वयनका क्रममा ५ हजार ३६४ जनालाई पक्राउ गरी १ अर्ब १९ करोड जरिवाना असुल गरेको छ।

प्रहरीका अनुसार चालु आर्थिक वर्षको साउनदेखि पुस मसान्तसम्ममा ५ हजार ३६४ जना फरार प्रतिवादी पक्राउ परेका छन्। साथै उनीहरूलाई तोकिएको १ अर्ब १९ करोड ८४ लाख ४९ हजार ३६१ जरिवाना असुल उपर गरिएको छ।

उक्त रकम अघिल्लो आर्थिक वर्षको सोही अवधिमा भन्दा करिब ३१३ प्रतिशतले बढी हो। सो अवधिमा केन्द्रीय अनुसन्धान व्यूरो महाराजगञ्जबाट ५४ जना, काठमाडौं उपत्यकाबाट ६ सय १३ जना, कोशी प्रदेशबाट ८२५ जना, मधेश प्रदेशबाट १ हजार ७९७ जना, बागमती प्रदेशबाट ५२२ जना, गण्डकी प्रदेशबाट ४४७ जना, लुम्बिनी प्रदेशबाट ९१६ जना, कर्णाली प्रदेशबाट ८३ जना र सुदूरपश्चिम प्रदेशबाट १०७ जना पक्राउ परेका हुन्।

अघिल्लो आर्थिक वर्षको सोही अवधिमा ३ हजार १५० जना पक्राउ परेका थिए। कर्तव्य ज्यान, लागुऔषध, जबरजस्ती करणी, बैंकिङ कसूर, ठगीलगायत विभिन्न मुद्दामा फैसला ठहर भई फरार रहेका प्रतिवादी पक्राउ गर्ने सन्दर्भमा नेपाल प्रहरीले विशेष अभियान नै सञ्चालन गरी फैसला कार्यान्वयनलाई तीव्र गतिमा अघि बढाएको अपराध अनुसन्धान विभागका प्रहरी नायब महानिरीक्षक जनक भट्टराईले बताए।