परराष्ट्रमन्त्री साउदले लिए सपथ

काठमाडौं– परराष्ट्रमन्त्री एनपी साउदले पद तथा गोपनीयताको सपथ लिएका छन्। साउदलाई आइतबार शीतल निवासमा आयोजित समारोहमा राष्ट्रपति रामचन्द्र पौडेलले सपथ गराएका हुन्।

नेपाली कांग्रेसका केन्द्रीय सदस्य समेत रहेका साउदलाई प्रधानमन्त्री पुष्पकमल दाहाल प्रचण्डले आठौं पटक मन्त्रिपरिषद् विस्तार गर्दै परराष्ट्रमन्त्रीमा नियुक्त गरेका हुन्। कांग्रेसबाट यसअघि चार जना मन्त्री बनिसकेका छन्। उपसभापति पूर्णबहादुर खड्का उपप्रधान तथा रक्षा मन्त्री, डा प्रकाशशरण महत अर्थ, रमेश रिलाल उद्योग र सिता गुरुङ शहरी विकास मन्त्री बनेका थिए।

यस्तै नेकपा एकीकृत समाजवादीकी नेतृ नन्दा चपाई परराष्ट्र राज्यमन्त्री नियुक्त भएकी छन्। उनलाई प्रधानमन्त्री दाहालले सपथ गराएका छन्।

को हुन् साउद?

साउद २०३६ साल देखी राजनीतिमा सक्रिय छन्। उनी २०३६ सालमा महेन्द्रनगर माध्यामिक विद्यालयको नेपाल विद्यार्थी संघको इकाइ सचिव बनेका थिए।

विद्यार्थी संगठनहरूमाथि लगाइको प्रतिबन्ध २०३६ सालमा हटेपछि भएको स्ववियूको निर्वाचनमा सिद्धनाथ विज्ञान क्याम्पसमा आईएस्सी पढ्दै गर्दा सचिवमा निर्वाचित भएका थिए। २०४१ सालमा नेपाल विद्यार्थी संघको निर्वाचनमा केन्द्रीय सदस्य बनेका साउद २०४८ सालमा २६ वर्षको उमेरमै केन्द्रीय अध्यक्ष निर्वाचित भएका थिए।

नेविसंघको इतिहासमा निर्वाचनमार्फत् चुनिएको साउदको कमिटी दोस्रो थियो। त्यसअघि पार्टी नेतृत्वले आफ्नो विश्वासपात्रलाई नेविसंघको अध्यक्ष बनाउने परम्परा थियो। ०५९ वर्तमान सभापति शेरबहादुर देउवाको नेतृत्वमा कांग्रेस विभाजित भएर बनेको नेपाली कांग्रेस प्रजातान्त्रिकको केन्द्रीय सदस्यका साउद कांग्रेस प्रजातन्त्रिकको ११औं महाधिवेशनमा पनि केन्द्रीय सदस्य बने। साउद ०६४ मा कांग्रेस र कांग्रेस प्रजातन्त्रिकबीच एकता हुँदा पनि केन्द्रीय सदस्य नै बनेका थिए। त्यसयता उनी निरन्तर कांग्रेसको केन्द्रीय सदस्यमा निर्वाचित हुँदै आएका छन्।

२०५१ सालमा पहिलो पटक संसदीय निर्वाचनमा प्रतिस्पर्धा गरेका साउद निर्वाचित हुन भने सकेनन्। २०५६ सालमा विजयी बनेका उनी २०६४ मा पराजित भए। २०७० मा निर्वाचित भएपनि २०७४ मा पराजित बन्न पुगेका थिए। २०७९ मा उनी पुनः निर्वाचित भएका थिए। साउद २०५६ मा शिक्षा राज्यमन्त्री र २०७० मा सिचाईंमन्त्री बनेका थिए।