प्रचण्डले किन छुट्टाछुट्टै भेटे देउवा र ओली?

काठमाडौँ- प्रधानमन्त्री पुष्पकमल दाहाल ‘प्रचण्ड’ले सत्ता साझेदार नेपाली कांग्रेसका सभापति शेरबहादुर देउवा र प्रमुख प्रतिपक्षी दल नेकपा एमालेका अध्यक्ष केपी शर्मा ओलीसँग छुट्टाछुट्टै भेट गरेका छन्।

आइतबार बिहान प्रधानमन्त्री निवास बालुवाटारमा ओली र देउवासँग प्रधानमन्त्रीले कुराकानी गरेका हुन्।

ओलीपछि प्रधानमन्त्रीले देउवासँग कुराकानी गरेका थिए। संक्रमणकालीन न्यायसम्बन्धी विधेयकका विषयमा प्रधानमन्त्रीले ओली र देउवासँग छलफल गरेको प्रधानमन्त्रीका प्रेस सल्लाहकार गोविन्द आचार्यको भनाइ छ।

संसदको कानुन, न्याय तथा मानवअधिकार समितिमा संक्रमणकालीन न्यायसम्बन्धी विधेयक विधाराधीन छ।

दलहरूबीच कुरा मिल्न नसक्दा संक्रमणकालीन न्याय सम्बन्धि विधेयक संसदको कानुन समितिमा लामो समयदेखि अड्किएर बसिरहेको छ।

यो विधेयक २०७९ फागुन २५ गते प्रधानमन्त्री प्रचण्डले संसदमा दर्ता गरेका थिए।

विधेयकमा सहमति जुटाउन जेठ ५ गते ११ सदस्यीय उपसमिति गठन गरिएको थियो।

उपसमितिले चारवटा मिल्न बाँकी रहेका विषय थाती राखेर गत असोज २३ गते प्रतिवेदन तयार पारेको थियो।

सबै विषय मिलाएर ल्याउन भन्दै उक्त विधेयक समितिमा नै फिर्ता भएको अवस्था छ।

उक्त विधेयकमा छलफल गर्ने तयारी समितिले गरेपछि प्रधानमन्त्रीले सक्रियता बढाएका हुन्।

प्रतिपक्षी दलहरूले विवादित मन्त्रीहरू मोहन बस्नेत, सुदन किराती, प्रकाश ज्वालाको राजीनामा माग गर्दै सदनमा लगातार अवरोध गरेपछि सभामुख देवराज घिमिरेले एमाले सांसदका प्रश्नको सामना सोमबार गर्न प्रधानमन्त्री दाहाललाई रुलिङ गरेका छन्।

प्रधानमन्त्रीले आफूहरूका प्रश्नको जवाफ नदिएसम्म सदन चल्न नदिने अडान लिएपछि फागुन १८ गते घिमिरेले यस्तो रुलिङ गर्नुपरेको हो।

यसअघि प्रधानमन्त्री दाहालले लगातार संसदमा उपस्थित हुन अस्वीकार गर्दै आएका थिए।

यस्तै एमालेले मन्त्रीहरूको राजीनामा माग गरिरहेका बेला मन्त्री फेरबदलका लागि दाहालले कांग्रेससँग सहमति जुटाउने प्रयास गरिरहेका छन्। पछिल्लो समय मन्त्री फेर्न देउवा पनि सकारात्मक रहेको बताइएको छ।

सदनमा एमालेको विरोध मत्थर गर्न र मन्त्री परिवर्तन गराउने प्रयासमा देउवालाई मञ्जुर गराउन प्रधानमन्त्रीले दुवै नेतासँग छुट्टाछुट्टै कुराकानी गरेका हुन्।