३ मन्त्रालय लिएर कर्णाली सरकारमा जाँदै कांग्रेस, ३ महिनामा तेस्रो पटक विश्वासको मत लिँदै मुख्यमन्त्री

सुर्खेत- कर्णाली सरकारमा सहभागी हुन नेपाली कांग्रेस सहमत भएको छ। सरकारको नेतृत्व गरिरहेका मा‌ओवादी केन्द्रका नेताहरूसँग कांग्रेसका नेताहरूको बैठकले सहमति जुटाएको हो। बुधबारसम्म कांग्रेसका मन्त्रीलाई शपथ गराउने तयारी मुख्यमन्त्री शर्माको छ।

नेपाली कांग्रेसले तीन मन्त्रालय लिएर सरकारमा जान लागेको हो। कांग्रेसले आर्थिक मामिला तथा योजना मन्त्रालय, सामाजिक विकास मन्त्रालय र उद्योग, पर्यटन, वन तथा वातावरण मन्त्रालयल लिएर सरकारमा सहभागी हुन लागेको हो। तर माओवादीले भने आर्थिक आफूसँगै राखेर भौतिक पूर्वाधार विकास मन्त्रालय कांग्रेसलाई दिन चाहेको छ।

प्रदेश सरमारमा माओवादीले भने सरकारको नेतृत्वसहित तीन मन्त्रालय लिने छ। उसले एक राज्यमन्त्री पनि लिनेछ। उता कांग्रेस संसदीय दलको बैठकले पनि शर्मा नेतृत्वको सरकारमा सहभागी हुने निर्णय गरिसकेको छ।

४० सदस्यीय कर्णालीमा माओवादी र कांग्रेस मिल्दा सरकारलाई आवश्यक मत पुग्ने अवस्था छ। कांग्रेसका १४ र माओवादीका १३ सांसद छन्। नेकपा एसका एक जना र स्वतन्त्र चयन भएका एक जनाले पनि माओवादी नेतृत्वको सरकारलाई समर्थन गर्ने सम्भावना छ। यसो गर्दा मुख्यमन्त्री राजकुमार शर्मा नेतृत्वको सरकारलाई २९ मत प्राप्त हुने रहेको माओवादीका एक नेताले बताए। सरकारलाई पूर्णता दिएर वैशाख ७ गते शर्माले प्रदेशसभाको विश्वासको मत लिने तयारी गरेका छन्।

२०७९ पुस २७ गते मुख्यमन्त्री नियुक्त भएका शर्माले यसअघि नै दुई पटक विश्वासको मत लिइसकेका छन्। माघ ६ गते पहिलो पटक विश्वासको मत लिएका उनलाई दिएको विश्वासको मत राप्रपाले फागुन १८ मा फिर्ता लिएको थियो। त्यसपछि उनले चैत १७ गते पनि विश्वासको मत लिए।

तर चैत २६ गते एमालेले पनि मुख्यमन्त्रीलाई दिएको समर्थन फिर्ता लिएपछि मुख्यमन्त्री शर्माले तेस्रो पटक विश्वासको मत लिने तयारी गरेका हुन्।