१० प्रतिशत घट्दै सेयर ब्रोकरको कमिसन

काठमाडौँ-  सेयर किनबेच गर्दा ब्रोकरले लिन पाउने कमिसनको दर घट्ने भएको छ। जेठ १ गतेदेखि लागू हुने गरी ब्रोकरको कमिसन १० प्रतिशत घट्ने भएको हो।

पुँजीबजार नियामक धितोपत्र बोर्डको आइतबार बसेको सञ्चालक समितिको बैठकले ब्रोकर कमिसन १० प्रतिशतले घटाउने तयारी गरिएको हो।

कमिसन घटाउन सञ्चालकहरू सहमत भएपनि सबै सञ्चालक उपस्थित नभएकाले निर्णय आधिकारिक रूपमा सार्वजनिक हुन बाँकी रहेको एक सञ्चालकले बताएका छन्।

१० प्रतिशत ब्रोकर कमिसन घटाउनका लागि अर्थ मन्त्रालयले अनुमति दिइसकेको छ।

हाल ५० हजार रूपैयाँसम्मको कारोबारमा लगानीकर्ताले ०.४० प्रतिशत रकम ब्रोकरलाई कमिसनका रुपमा दिनुपर्छ।  अब यो सीमाको कारोबारमा ०.३६ प्रतिशत ब्रोकर कमिसन लिन प्रस्ताव गरिएको छ।

यस्तै ५० हजारदेखि ५ लाख रूपैयाँसम्मको कारोबारमा ०.३७ प्रतिशत कमिसन ब्रोकरले पाउँदै आएका छन्। यो सीमाको कारोबारमा ०.३३ प्रतिशत कमिसन ब्रोकरले पाउनेछन्।

५ लाखदेखि २० लाख रूपैयाँसम्मको कारोबारमा ०.३४ प्रतिशत कमिसन ब्रोकरले राख्ने गरेका छन्। यो सीमामा रहेर कारोबार गर्दा ०.३०६ प्रतिशत कमिसन मात्र ब्रोकरले राख्नेछन्।

२० लाखदेखि एक करोड रूपैयाँसम्मको कारोबारमा ०.३० प्रतिशत र एक करोड रूपैयाँभन्दा धेरैमा ०.२७ प्रतिशतसम्म कमिसन शुल्क लाग्छ। यस्तै २० लाखदेखि एक करोड रूपैयाँसम्म ०.२७ प्रतिशत र १ करोड रूपैयाँभन्दा माथिको कारोबारमा ०.२४३ प्रतिशतसम्म कमिसन लाग्नेछ।