कांग्रेसका रायलाई पछि पार्दै अघि बढे मोदी

नयाँदिल्ली– भारतीय लोकसभा निर्वाचनको जारी मतगणनामा प्रधानमन्त्री नरेन्द्र मोदीले फेरि अग्रता बनाएका छन्।

मोदीले भारतीय राष्ट्रिय कांग्रेसका उम्मेदवार अजय रायलाई पछि पार्दै अघि बढेका हुन्।

नेपाली समय अनुसार ११:०९ बजे भारतीय निर्वाचन आयोगले अद्यावधिक गरेको जारी गणनाको पछिल्लो तथ्यांकमा मोदीले १ लाख १९ हजार ४८५ मत पाएका छन्। मोदीले पाएको मत निकटतम प्रतिस्पर्धी रायले पाएको मत भन्दा ३४ हजार ६३८ ले बढी हो।

मोदी उत्तरप्रदेशको वाराणसी क्षेत्रबाट चुनावी प्रतिस्पर्धामा छन्। मतगणनाको अन्तिम नतिजा मंगलबारै सार्वजनिक हुने अनुमान गरिएको छ।

५४३ सिटका लागि भएको लोकसभा निर्वाचनको जारी गणनामा भाजपा नेतृत्वको एनडीएले २९० सिटमा अग्रता बनाएको छ भने कांग्रेस नेतृत्वको इन्डिया गठबन्धनले २०४ सिटमा अग्रता बनाएको छ।

यी दुवै गठबन्धनबाहिरका उम्मेदवारले ३९ सिटमा अग्रता बनाएका छन्। एक सिटमा भाजपा विजयी भएको छ भने ९ सिटमा गणना सुरु हुन बाँकी छ।

उता इन्डियामा राहुल गान्धीले भने अग्रता बनाएका छन्। उत्तरप्रदेशकै रायबरेलीबाट गान्धी उम्मेदवार छन्। गान्धीले १ लाख मत कटाउँदा ५० हजारभन्दा बढी मतको अग्रता बनाएका छन्।